Jaqynda Cheshenstan Mádenıet mınıstrliginiń qoldaýymen Groznyı qalasynda áıgili bıshi, aty ańyzǵa aınalǵan Mahmýd Esambaev atyndaǵy IX Halyqaralyq bıshiler konkýrsy ótti. Atalmysh konkýrsqa Reseı, Grýzııa, Tatarstan, Belarýs, Qalmaq Respýblıkasy, Soltústik Osetııa-Alanııa, Daǵystan syndy 16 eldiń ókilderi qatysty.
Qazaqstannyń atynan Mádenıet jáne sport mınıstrliginiń qoldaýymen «Saltanat» bı ansambliniń beldi ártisi Ernur Qaryqbol qatysty.
Ernur Qaryqbol jeke bı atalymynda «Mońǵol» jáne «Aqqý» bılerin oryndady. Shetelderden kelgen oryndaýshylardyń sheberligine qaramastan, ol óte joǵary kásibı tehnıkalyq deńgeıde oryndaýymen qazylardyń kózine erekshe tústi. Osylaısha Ernur Qaryqbol Mahmýd Esambaev atyndaǵy IX Halyqaralyq bıshiler konkýrsynyń Gran-prı júldegeri atandy.
Júldeni Cheshen Respýblıkasynyń prezıdenti Ramzan Qadyrov óz qolymen tabystady. Konkýrstyń saltanatty jabylý rásimi Ernur Qaryqboldyń oryndaýyndaǵy «Mońǵol» bıimen aıaqtaldy.
Ernur Qaryqbol «Saltanat» bı ansambliniń kórkemdik jetekshisi – bas baletmeıster, «Qurmet» jáne «Parasat» ordenderiniń ıegeri, Qazaqstannyń eńbek sińirgen qaıratkeri Gúlsáýle Orýmbaevanyń shákirti.
«Egemen-aqparat»