Búgin Erevanda QR Premer-Mınıstri Baqytjan Saǵyntaev Armenııa, Qyrǵyzstan, Reseı jáne Belarýs úkimet basshylarynyń qatysýymen Eýrazııalyq úkimetaralyq keńes otyrysyna qatysty, dep habarlady primeminister.kz.
EÚAK otyrysy bastalar aldynda Armenııa Prezıdenti S. Sargsıan Erevanda jumys saparymen júrgen Qazaqstan, Qyrǵyzstan, Reseı jáne Belarýs Premer-Mınıstrlerin qabyldady. Qonaqtarǵa izgi iltıpatyn bildirgen soń Serj Sargsıan atalǵan kezdesý qarym-qatynastardy odan ári nyǵaıtý jolyndaǵy taǵy bir mańyzdy qadam bolatynyna senim bildirdi.
Kezdesýde taraptar ıntegrasııalyq qalyptastyrýlar aıasyndaǵy iske asyrylatyn jobalardy talqylady. Saýda-ekonomıkalyq baılanystardy nyǵaıtýǵa jáne aldynda jasalǵan kelisimderdi iske asyrý boıynsha yntymaqtastyqqa erekshe nazar aýdaryldy.
Shaǵyn quramdaǵy EÚAK otyrysy barysynda qatysýshylar EAEO sıfrlyq kún tártibi aıasynda bastamalardy pysyqtaý tártibin, ishki naryqtaǵy alyp tastaýlar men shekteýlerdi joıý boıynsha 2018-2019 jyldarǵa arnalǵan is-sharalar josparyn, avıasııalyq oqıǵalardy zertteý boıynsha organ qurý jumysynyń barysy, keme qatynasy týraly Kelisim jobasyn, sondaı-aq EAEO-da sáıkestendirý quraldarymen taýarlardy tańbalaý týraly Kelisim jobasyn jáne t. b. qarady.
Keń quramdaǵy EÚAK otyrysynda sóz sóılegen Baqytjan Saǵyntaev búgingi tańda halyqaralyq saýda qatynastaryn transformasııalaý júrip jatqanyn, qoldaýshylyq trendi jáne iri elder arasynda óńirlik saýda aımaqtaryn salýǵa básekelestikti arttyrý kúsheıtilip jatqanyn aıtyp ótti.
Osyǵan baılanysty EAEO ortamerzimdi ulttyq saıasattarǵa júıelik túzetý júrgizýi jáne olardy jańa sharttarǵa beıimdeýi tıis. EAEO qurylǵan sátten bastap qatysýshy elderdiń ekonomıkalaryn damytýǵa baǵyttalǵan basty baǵdarlamalyq qujattar qabyldandy, alaıda qazirgi ýaqytta olardy iske asyrý ózekti ekonomıkalyq taldaýmen nyǵaıtylýy qajet.
EÚAK otyrysynyń qorytyndysy boıynsha birqatar qujattarǵa qol qoıyldy, olardyń ishinde EAEO sıfrlyq kún tártibi aıasynda bastamalardy pysyqtaý týraly, EAEO múshe elderdiń kelisilgen kólik saıasatyn iske asyrýdyń negizgi baǵyttary men kezeńderin júzege asyrý boıynsha jol kartasynyń is-sharalar josparyn bekitý týraly 2018-2020 jyldarǵa arnalǵan Sheshimder bar.
Budan ózge, ishki naryqtaǵy alyp tastaýlar men shekteýlerdi joıý boıynsha 2018-2019 jyldarǵa arnalǵan is-sharalar jospary týraly, avıasııalyq oqıǵalardy zertteý boıynsha organ qurý týraly, jalpy elektr energetıkasy naryǵy aıasynda aqparattyq almasý júıesin qalyptastyrý týraly, sáıkestendirý quraldarymen taýarlardy tańbalaý týraly Kelisim jobasy týraly jáne 2018-2020 jyldary «Eýrazııa aptalyǵy» kórmelik forýmyn ótkizý týraly О́kimderge qol qoıyldy. Budan ózge, keme qatynasy týraly Kelisim jobasy týraly Tapsyrmalarǵa jáne basqa da qujattarǵa qol qoıyldy.