Memleket basshysy táýelsizdik tańyna qadam iliktirgeli el bolashaǵyna, tutastyǵyna jáne jańǵyrýyna qatysty keleli ister men sony bastamalardy kezeń-kezeńimen usynyp, jemisti júzege asyryp keledi.
Qazir búkil qoǵam bolyp qolǵa alyp, ár salada irgeli ister atqaryp jatqan «Bolashaqqa baǵdar: rýhanı jańǵyrý» baǵdarlamasy eldiń sanasyna serpilis bergen bastama boldy. Elbasy 2012 jylǵy jeltoqsan aıynda jarııa etken «Qazaqstan-2050» Strategııasynda 2025 jyldan bastap latyn álipbıine kóshýge kirisýimiz kerektigin málimdegen bolatyn. Osy málimdemesi rýhanı jańǵyrýdyń ózekti bir salasy retinde atalmysh maqalada keńinen kórinis tapty. Osydan soń-aq elimizde latyn álipbıiniń tıimdi nusqasyn daıyndaý, 2018 jyldan bastap jańa álipbıdi úıretetin mamandardy jáne orta mektepterge arnalǵan oqýlyqtardy daıyndaýǵa kirisý úshin aldaǵy 2 jyldy uıymdastyrý jáne ádistemelik jumystar júrgizýge arnaý, sondaı-aq 2025 jylǵa qaraı is qaǵazdaryn, merzimdi baspasózdi, oqýlyqtardy latyn álipbıimen basyp shyǵarýǵa kirisý mindettemesi qoıyldy.
Elbasynyń tapsyrmasyna jáne kestege saı jýyrda ǵalymdardyń, til bilimi salasynyń ókilderiniń jáne barsha qandastarymyzdyń atsalysyp aqyldasýy nátıjesinde qazaq álipbıiniń jańa grafıkadaǵy biryńǵaı standartty nusqasy usynyldy. Jobanyń tıimdiligi men qazaq tilindegi dybys, áripterdi berýdegi tıimdiligi til bilimi salasynyń kórnekti ǵalymdarynyń talqylaýynan ótken jáne úırenýshiler úshin jeńil bolýymen erekshelenedi.
Úsh tildi bilim berý baǵdarlamasy boıynsha dáris alyp jatqan oqýshylar úshin latyn álipbıi qazirdiń ózinde keńinen qoldanysta jáne bul máselege jalpyhalyqtyq turǵyda úlken daıyndyqpen, zor uıymdastyrý jumystary nátıjesinde keletindikten, atalmysh álipbıge ótý barysynda oqýshylar tarapynan asa qatty qınalys bola qoımaıdy dep senemiz. Balabaqshalarda jumys júrgizýdiń de ózindik jolyn, baǵyt-baǵdaryn belgilep, sol arqyly mektepke deıingi tárbıede balanyń sanasyna, oı-tanymyna jańa álipbıdiń negizin qalap jiberý basty nazarda.
Latyn álipbıine kóshý – qazaq halqy úshin shynaıy rýhanı jańǵyrýdyń kórinisi bolmaq. Bul – álemdik ǵalamtorlyq jáne aqparattyq keńistikke ený, tarıhı, ádebı-mádenı jańalyqtarǵa qoljetimdilik, ótkendi taný jáne tarıhı negizge jaqyndaı túsý. Sondyqtan, uıymdastyrý jumystaryna barshamyz bir kisideı atsalysyp, jaqsy iske qoldaý kórsetýdi azamattyq paryz sanaımyz.
Mánet ShYRAQBAI, «Jaýqazyn» balalar baqshasynyń meńgerýshisi,
Túpqaraǵan aýdandyq máslıhatynyń depýtaty
Mańǵystaý oblysy, Túpqaraǵan aýdany