Kitaphananyń mereıtoıyna oraılastyryp, «Qoǵam damýyndaǵy memlekettik kitaphanalar roli» atty óńiraralyq ǵylymı-praktıkalyq konferensııa ótti.
Kitaphananyń negizi HIH ǵasyrda qalanǵanymen, 1937 jyly ol oblystyq mártebe aldy. Konferensııa jumysyna Qazaqstannyń barlyq shalǵaıynan jáne Reseıdiń kórshi Chelıabi oblysynan qonaqtar keldi.
Onda sóz sóılegen oblys ákiminiń orynbasary Marat Júndibaev kitaphananyń buqaralyq sıpat alýy atqarýshy bılik qamqorlyǵynyń kórinisi bolyp tabylatynyn aıtty. О́tken jyly kitaphananyń materıaldyq-tehnıkalyq bazasyn nyǵaıtý maqsatynda bıýdjetten 58 mıllıon teńge qarajat bólindi. Internettiń ómirimizge aralasýyna oraı, kitaphanaǵa adamdar barmaıdy degen pikir qalyptasyp ta úlgergen. Alaıda jergilikti jerlerde kórinis, tipti basqasha bolyp otyr. Kitaphana qazir kópshiliktiń jıi bas suǵatyn orny, kitap oqýmen birge, munda túrli mádenı sharalar da ótip jatady.
«Jaqynda Qarabalyq pen Denısov aýdanyna barǵanymyzda kitaphananyń aýyldaǵy basty mádenı oshaq ekenine kózimiz jetti. Onda aýyldaǵylardyń qyzyǵýshylyǵyna qaraı túrli klýbtar jumys isteıdi, aksııalar ótip jatady. Kitaphanalardyń qyzmet túri jyl saıyn keńeıip keledi. Tek jergilikti jerlerde oǵan jetkilikti jaǵdaı jasalýy tıis. Oblystyq mártebesi bar eki kitaphanaǵa – Qostanaıdaǵy L.Tolstoı atyndaǵy oblystyq kitaphana men Arqalyq qalasyndaǵy ortalyq k itaphanaǵa kúrdeli jóndeý jumystary qajet» dedi oblystyq kitaphananyń dırektory Darıǵa Tórebaıqyzy.
Ǵylymı-praktıkalyq konferensııaǵa belgili mádenıettanýshy, jazýshy, qoǵam qaıratkeri Murat Áýezov te shaqyryldy. Ol kitaphana qoryna óziniń jańa kitaptaryn syıǵa tartty.
«Kitaphananyń qurylǵan jylynyń ózi onyń qasıetti qyzmetinen habar berip turǵandaı. 1937 jyly halqymyzdyń rýhanı tireginiń, qaımaǵynyń barlyǵyn sypyryp ketkende, oblystaǵy kitaphana sonyń ornyn toltyrý úshin qurylǵandaı kórinedi maǵan. Kitaphana naǵyz adamzat mádenıetiniń turaqty ordasy» dedi Murat Muhtaruly.
Názıra Járimbet
«Egemen Qazaqstan»
Qostanaı