Semeıdegi Abaı atyndaǵy ámbebap kitaphananyń latyn álipbıine arnalǵan kezekti sharalary О́skemen jáne Kýrchatov qalalarynda jalǵasty. Eki qala Semeıden óte alys ornalasqandyqtan, kitaphana qyzmetkerleri shalǵaı joldy qıynsynbaı, latyn tilindegi basylymdary men kitaptaryn arqalap, jergilikti halyqty rýhanı tyń dúnıemen sýsyndatyp qaıtýdy jón kóripti.
Kýrchatov qalasynda «Latyn álipbıi - bolashaqtyń baǵdary» atty dóńgelek ústel de uıymdastyryldy. Dóńgelek ústelge qalalyq ishki saıasat bóliminiń mamandary, qala mektepteriniń qazaq tili men ádebıet pániniń muǵalimderi, «Dostyq úıiniń» qyzmetkerleri, kitaphanashylar jáne mektep oqýshylary qatysyp, latyn álipbıiniń qazaq tilin damytýdaǵy mańyzdylyǵy, ózektiligi jaıly jan-jaqty talqylaǵan.
-Osy latyn tilindegi qor jınaǵymen Shyǵys Qazaqstan oblysyndaǵy taǵy biraz jerlerdi aralamaqpyz,-dedi Abaı atyndaǵy oblystyq kitaphana dırektorynyń orynbasary Gúlmıra Aıazbaeva, - bizdiń qorda 200-ge jýyq sırek basylym saqtaýly tur. О́skemen qalasyndaǵy A. S. Pýshkın atyndaǵy Shyǵys Qazaqstan oblystyq kitaphanasyna barǵanymyzda, ol jerge ShQMTÝ stýdentteri men О́skemen qalasynyń jýrnalısteri jınaldy. Elbasy N.Nazarbaevtyń «Bolashaqqa baǵdar: rýhanı jańǵyrý» maqalasy aıasynda uıymdastyrylǵan retro-kórmede qoǵamdyq-saıası, halyq aǵartý isi, til bilimi, jaratylystaný, densaýlyq saqtaý, aýylsharýashylyq, ádebıettaný, tarıh ǵylymdary, kórkem ádebıet ǵylym salalary, tatar tilindegi kitaptar men merzimdi basylymdardy tamashalaǵan óskemendikter bizge erekshe tań qala bas shaıqady. Máselen, Á.Ermekovtiń «Uly matematıka kýrsy» (1935j.), A.Mamytulynyń «Densaýlyq jolynda» (1935 j.), T.Shonanulynyń «Orystarǵa qazaq tilin úıretkish» (1931j.), Tańqybaı (I.Jansúgirov) «Quq: satıralyq áńgimeler jınaǵy» (1935 j.) sııaqty júzdegen basylymdar latyn tilinde. Eń qundy qazynamyz «Abaı» shyǵarmalarynyń sol jyldardaǵy latyn árpindegi nusqasy deı alamyn.
Raýshan Nuǵmanbek,
«Egemen Qazaqstan»
SEMEI