Bul – rýhanı ómirimizdegi aıtýly kún. Kóp jyldar el esinen ketpeı, aýyq-aýyq aıtys-tartysqa sebep bolǵan qazaq jazýynyń latyn qarpine kóshý ıdeıasy búgin máresine jetti. Biz óz jolymyzdy tańdadyq. Prezıdent latyn qarpindegi qazaq álipbıiniń sońǵy nusqasyna qol qoıdy.
Áli esimde, osydan shırek ǵasyr buryn tuńǵysh Til komıteti qurylǵan jyly latyn qarpine kóshý týraly ıdeıa keń talqyǵa tústi. Tilshi ǵalymdardyń usynysyn Til komıteti qyzý qoldap, baspasózde bir jyldaı pikirtalas uıymdastyrdy. Buǵan qalyń qaýym belsene atsalysty.
Latyn qarpine kóshýdiń paıdaly jaǵy da, kemshiligi de sóz boldy. О́te salıqaly pikirler aıtyldy. Latyn qarpindegi qazaq álipbıiniń kóptegen nusqalary jınaqtaldy. Buǵan qarapaıym ınjenerden bastap, tilshi ǵalymdar, mektep muǵalimderi – jalpy shyǵarmashylyq ıntellıgensııa belsene aralasty. Nátıjesinde, osy usynystardy taldap, jınaqtap, qoldap Prezıdent apparatyna joldadyq. Bizdiń bul áreketimiz qısyndy bolǵanymen táýelsizdiktiń eleń-alańynda, qazaq tili áli eńsesin tiktemeı turǵanda asyǵystyqqa aparatyn edi.
Sondyqtan, bul ıgilikti is óziniń juldyzdy shaǵyn tosty. Ol kún týdy. Sońǵy bir jyl boıǵy talqylaýdan baıqaǵanymyz latyn qarpine kóshý – ońaı sharýa emes. Bul – búkilhalyqtyq, memlekettik asa mańyzdy is. Odan eshkim de syrt qalmaýǵa tıis. Endeshe bos daýrýǵýdy azaıtyp, endi naqty sharýa tyndyrý kerek. Bul bir kúnniń, bir jyldyń ótkinshi oqıǵasy emes, bolashaq urpaǵymyzdyń órkenıet kóshinde óz ornyn taýyp, ana tilimizdiń jańǵyryp damýyna, shyn máninde memlekettik til dárejesine kóterilýine qyzmet etetin basty quralǵa aınalsa, ózge tildiń óktemdigine tosqaýyl bolsa, tilektiń oryndalǵany dep oılaımyn.
Sultan ORAZALY, jazýshy, burynǵy Mınıstrler kabınetiniń janyndaǵy til komıtetiniń tuńǵysh tóraǵasy, Qazaqstannyń eńbek sińirgen qaıratkeri, professor