Ońtústik Qazaqstan oblysynyń ortalyǵy - Shymkent qalasynda robot jasaý tehnıkasynyń mektebi ashyldy. Bul ıgi sharany "Bıznestiń jol kartasy - 2020" baǵdarlamasynyń memlekettik grantyn jeńip alǵan Astana qalasyndaǵy N. Nazarbaev ýnıversıtetiniń túlekteri qolǵa alyp otyr. Robottardy qurastyrýdyń alǵashqy jobasy Astanada sátti júzege asyrylǵan soń jastar kıbermashınalardy qurastyrý negizin shymkenttik balalarǵa úıretýge sheshim qabyldapty.
3 mln teńge kóleminde qaıtarymsyz grant ıelengen túlekter bul qarjyǵa ǵımarat jaldap, qajetti tehnıka satyp alǵan. Joba jetekshileriniń biri Saodat Estııarovanyń aıtýynsha, olar balalarǵa robot jasaý tehnıkasynyń barlyq negizin úıretpek. Bul ádis Astana qalasynda sátti tájirıbeden ótipti.
«Tórt aı boıǵy úıretý merziminde balalar elektromobıldermen kvadrokopter qurastyrýdy úırenedi. Munymen qosa baǵdarlama jasaýdy, 3D modeldeý men basyp shyǵarý, gadjet, qosymshalar men saıt jasaýdy oqıdy. Mańyzdysy - baǵdarlama jasaýǵa úıretý prosesi oıyn túrinde ótedi. Sonyń nátıjesinde balalar oqyǵandaryn jaqsy meńgeredi», - deıdi joba jetekshisi jáne Nazarbaev ýnıversıtetiniń túlegi Saodat Estııarova.
Aıta keteıik, atalǵan mektepke balalar 5-7 jastan qabyldanady. Kýrs 4 aıǵa sozylady. Oqý aqysy - aıyna 15 myń teńge.
Oblystyq kásipkerlik, ındýstrıaldy-ınnovasııalyq damý jáne týrızm baǵdarlamasy ókilderiniń aıtýynsha, "Bıznestiń jol kartasy - 2020" baǵdarlamasy aıasyndaǵy memlekettik granttar shaǵyn jáne orta bıznes sýbektilerine, onyń ishinde bastaýysh kásipkerlerge beriledi. Buǵan qosa, áıelderge, múgedekter men jasy 50-den asqan jandarǵa ekonomıkanyń basym sektorlary men óńdeý ónerkásibi salalarynda jańa bıznes-ıdeıalaryn júzege asyrý úshin tegin jáne qaıtarymsyz granttar beriledi.
«Bir kásipkerge beriletin granttyń eń kóp somasy - 3 mln teńgeni quraıdy. Qoldaýdyń osynaý grant túri jergilikti bıýdjet esebinen júzege asyrylady. Baǵdarlama júzege asyryla bastaǵaly beri jalpy somasy 300 mln teńge bolatyn 96 grant berildi. Onyń ishinen 2017 jyly 29 mıllıon teńge bolatyn 10 grant berildi», - deıdi OQO kásipkerlik, ındýstrıaldy-ınnovasııalyq damý jáne týrızm bacqarmasynyń bólim basshysy Úsen Isaev.