«Astana» velokomandasy úshin bıylǵy jyl jeńilisi men jeńisi qatar órildi dep aıtýǵa bolady. Jyldyń alǵashqy jartysy shym-shytyryq oqıǵalarǵa toly boldy. Komandaǵa kóz tıdi me, álde sóz tıdi me, áıteýir kóp jarysta joly bola qoıǵan joq. Alaıda, keıinnen grand-týrdyń kezeńderin jeńip, mańdaıdan ashy terdi bir súrtti. Komandany jeńiske bastap júrgen komanda basshysy Aleksandr Vınokýrov qaýyrt sharýadan qoly qalt etken sátte «Egemen Qazaqstanǵa» maýsymdy qorytyndylap, suhbat bergen edi.
– 2017 jyldy «Astana» velokomandasy jańartylǵan kúıde bastady. Velosıpedter, komandanyń jeıdesi jáne shabandozdar tizimi de ózgerdi. Jalpy, komanda aldyna qoıǵan maqsattarǵa jete aldy ma?
– Rasymen de, biz 2017 jyldy tipti jańasha bastadyq. Velosıpedten bastap ústimizge kıetin jeıdelerge deıin jańarttyq. Shabandozdar quramyn da ózgerttik. Alaıda, jyldyń basy biz úshin sátsizdikpen órildi. Tájirıbeli shabandozymyz Mıkele Skarponıdiń qazasy komanda múshelerine qatty áser etti. Jarystarda shabandozdarymyz jıi jaraqat alyp, tas joldarda omaqasa qulaı berdi. Biraq, jyldyń ekinshi jartysynda barlyǵy óz ornyna kelip, komandaǵa sáttilik joldas bola bastady. Kolýmbııalyq jas shabandozymyz Mıgel Anhel Lopestiń tynysy ashyldy. Iаkob Fýlsang bizdiń komanda sapyndaǵy alǵashqy jeńisine qol jetkizdi. Al osy jeńisterdiń ishinde keýde kerip maqtanysh etetin aıtýly bir jetistik bar. Ol – Alekseı Lýsenkonyń grand-týrda kezeńdi jeńgeni. Iri dodalardy joǵarǵy deńgeıdiń shabandozdary ǵana jeńetinin bilesizder, demek bizdiń elde sondaı bir shabandoz paıda boldy degen sóz.
– Komanda sapyndaǵy shabandozdar jaıly sóz bolǵanda qazaqstandyq jigitterdiń kóbeıgeni qýantady. Ujymnyń úshten biri otandyq velosporttyń túlekteri ekeni belgili. Olardyń ishinde qaısysynan zor úmit kútesiz?
– Álemdik velosportta ataq-abyroıy joǵary jarystarǵa qatysatyn «Astana» komandasynyń sapynda osal shabandoz bolmaýy tıis. Demek, elimizdegi velosporttyń deńgeıi kóterildi dep aıta alamyz. О́te tyńǵylyqty tekseristen keıin, synnan ótken sportshylardy ǵana iriktep, komandaǵa qosamyz. Mysalǵa, komandamyz qurylǵaly beri 268 ret jeńiske jettik. Sonyń 25 paıyzy (68 jeńis) qazaqstandyq shabandozdardyń enshisinde. Al qazir komandadaǵy jastar jaıly aıtatyn bolsaq Alekseı Lýsenkodan zor úmit kútemiz. Ol óziniń talantty shabandoz ekendigin bıyl dáleldep berdi. Odan bólek ózge de jigitterdi aıta ketýge bolady. Mysaly, Jandos Bıjigitov pen Bahtııar Qojataev kún sanap sheberlikterin arttyryp keledi. Olardyń jeke nátıjeleri de kúsheıdi. Biz velosporttyń eń aldymen komandalyq sport ekenin umytpaýymyz kerek. Munda bir shabandozǵa qalǵan komandalastary kómektesedi. Sol sekildi otandyq sportshylar arasynan tamasha «gregorıler» ósip shyqty. Taýly kezeńde de, jazyqty dalada da, kedir-búdirli joldardy da bir demmen júrip ótetin jigitterdi daıyndap aldyq. Endi olar jaqyn arada Qazaqstan Ulttyq quramasynyń sapynda jemisti óner kórsetip, nátıje bere bastaýy tıis.
– Mıkele Skarponıdiń qazasy, Kataldo, Kangert, Fýlsang sekildi kóshbasshylardyń jaraqattary bolmaǵanda komanda qandaı nátıjeler kórseter edi dep oılaısyz.
– Bizdiń ujym grand-týrlarda jeńiske umtylatyn azýly komandanyń biri. Jyl saıyn «Týr de Frans», «Djırro», «Výelta» sekildi dodalardy jeńý úshin barymyzdy salamyz. Bıylǵy jyldyń basynda negizgi kúshti «Djırroǵa» salamyz dep sheshtik. Kapıtan bolyp Fabıo Arý júrsin dedik. Onyń qasyna kómekke kileń saıdyń tasyndaı myqtylarymyzdy saıladyq. Olardyń ishinde Skarponı, Kangert, Kataldo boldy. Alaıda, sáýir aıynda kapıtan bolady degen Arýymyz aıaqasty jaraqat aldy. Onyń ornyna birden Mıkele Skarponı ornyqty. О́ziniń sporttyq babyndaǵy tájirıbeli shabandozymyz grand-týr bastalýǵa 2-3 kún qalǵanda avtokólikpen qaqtyǵysyp, mert boldy. Bul aýyr qaza kúlli komandaǵa qatty áser etti. Sóıtip jarysqa kapıtansyz shyqtyq. Sosyn jarys barysynda Tanel Kangert joǵarǵy nátıje kórsetip kele jatqan-dy. Biraq, bolmaıtyn bir jerde qaqtyǵysyp, jaraqat aldy da, jarystan shyǵyp qaldy. Mine, osyndaı sátsizdikter serııasy bolmaǵanda jeńis bizdiń qolymyzda tur edi.
– Bıyl «Almaty týry» jarysy birinshi ret eki kúnge sozyldy. Osy jarystyń bolashaǵy jaıly aıtyp ótseńiz.
– Veloshabandozdardyń halyqaralyq qaýymdastyǵy osy jarysty ótkizý úshin jarystar kestesine engizýge daıyn. Kúntizbeden oryn alýdyń ózi ońaı emes. О́ıtkeni jyl boıy jarystar biriniń artynan biri kezektesip ótip jatady. Biraq, týra sol kúnder kelesi jyly «Týr de Franstyń» bastalatyn ýaqytyna dál kelip tur. Qazaqstan velosport federasııasynyń prezıdenti Darhan Amanuly Káletaev osy jaqynda UCI prezıdentimen kezdesti. Meniń jalǵyz ótinishim osy jarystyń kúnderin naqtylap alý bolatyn. Jaqyn arada jaýaby da shyǵyp qalar. Jarysty Pro-týr deńgeıine kótertýimiz kerek. Ondaı kúnge jetsek «Almaty týryna» álemdik týrdyń deńgeıindegi 10 komanda qatysar edi. Jarystyń syıaqysy kóterilip, abyroıy da ósedi. Eger ýaqyty ózgerissiz qalatyn bolsa, onda qyrkúıek aıynyń sońynda jarysty taǵy da eki týrǵa bólip, «Astana-Almaty» dep ótkizýge de bolady. Ol úshin ortasynda bir kún demalys bolýy kerek. Osy máseleni jaqyn arada keńese kelip, sheshetin bolamyz.
– «Astana» komandasynan Fabıo Arýdyń ketip qalǵany qyzyq boldy. Endi kelesi jyly komandaǵa kimder alynady?
– 2018 jylǵy quramymyz tolyqtaı jasaqtalyp qoıdy. Transferlik máselelerdiń barlyǵy sheshildi. Endi 8 jeltoqsan kúni Astanada tanystyrylym ótkizetin bolamyz.
– «Astana» Pro Team álemdik velo-sahnasynda talanttardyń ordasyna aınalǵandaı kórinedi. Jyl saıyn 2-3 talant jarq etip kórinedi. Kolýmbııalyq Lopesti menedjerler «fenomen» dep baǵalady. Osy jaqynda Pelo Bılbaomen kelisim uzartyldy. Kelesi jyly osy jigitterdiń qaısysynan joǵarǵy nátıje kútesiz?
– Iá, rasymen de Mıgel Anhel Lopesti «fenomen» dep aıta alamyn. Biz bul jigitten joǵary jetistikter kútemiz. Odan bólek, bizde turaqty túrde myqtylar qatarynda júretin Iаkob Fýlsang bar. Sondaı-aq taýly aımaqta tamasha júıtkıtin Tanel Kangert, Pelo Bılbao, Darıo Kataldo, Lýıs Leon Sanches sekildi saıypqyrandarǵa senim artamyz. Al klassıkalyq jarystarǵa shyǵaratyn Mıhael Valgren, ózimizdiń jigitterden Alekseı Lýsenko, Dmıtrıı Grýzdev daıyn. Alekseı aptalyq jarystarda kapıtan bolyp shyǵady dep otyrmyz. Odan bólek bıylǵydaı grand-týrlarda kezeńderge talasady. Demek, bizdi óte qyzyqty maýsym kútip tur. Bizdiń komandaǵa jankúıer bolyńyzdar. Alǵa, «Astana»!
– Áńgimeńizge rahmet.
Áńgimelesken Ermuhamed Máýlen