«Júre berseń, kóre beresiń», deıdi halqymyz. «О́mirde ne bolmaıdy», dep jatatynymyz taǵy bar. Aıtqymyz kelgeni – ózderin ónerge birtaban jaqynbyz dep sanaıtyn keıbir aqynsymaq pysyqaılardyń adamnyń oıyna kelmeıtin tásilderdi sheber qoldanyp, ońaı olja tabýdyń jolyn ıgerip alǵandyǵy. Onysyn ersi kórip te jatqan olar joq.
О́tkende bir tanysymyzdan mynadaı áńgime estidik. Bir top jerlester týrıstik saparǵa shyǵady. Ishterinde ózin aqynmyn dep esepteıtin bireý bolsa kerek. Qysqasy álgi aqyn saparlas serikteriniń birnesheýine ózinshe madaq óleń arnap, onysyna aqy dámetken kórinedi. О́zin maqtaǵandy kim jek kórsin, arnaý óleńniń keıipkerleri de qaryzdar bolyp qalmaı, teńgelerin usynypty.
Myna sáıkestikti qarańyz: dál osyndaı jaıǵa kýá bolamyz dep sirá oılappyz ba? Alaıda, ómirde bári de bola beredi eken-aý...
Oblys ortalyǵyndaǵy shıpajaıdyń birinde em-dom alyp, demalyp jatqanbyz. Ádettegideı áńgimelesip otyrǵanymyzda tynyǵýshylardyń biri: «Aramyzda bir aqyn jatyr eken. Azannan keshke deıin bólmesinen shyqpaıdy, qajet etken adam bolsa, aqysyna arnaý óleń jazyp beretin kórinedi», dep sońǵy jańalyqtyń shetin shyǵardy.
Kútken oqıǵa da kóp kúttirmedi. «Izdegenge – suraǵan» degendeı, arada shamamen ýaqyt ótkende, tús áletinde demalýshylardyń ortasyna aqynymyzdyń ózi kele qalmasy bar ma. Birden jınalǵandardyń nazaryn aýdaryp aldy da, áldekimge jazǵan arnaý óleńin oqı jóneldi. О́leńi mundaı uzaq bolar ma, on bes-jıyrma shýmaqtyń tóńireginde bolyp qalar.
Tynyǵýshylarǵa da qyzyq kerek: «Oı páli, jaraısyń!», negizinde ózińde birdeńe bar ǵoı, áıtpese jaıdan-jaı adam óleń shyǵara alýshy ma edi» desip, ózderinshe aqyndy kótermelep, qolpashtap jatty. Tek bir kókemiz ǵana: «Shyraǵym, mynaýyń poema bolyp ketti me, qalaı? Tym uzaq eken», dep qalǵany. Onysyna aqyn elemegendeı qalyp tanytyp, kezekti dúnıesin keıipkerine tapsyryp jatty.
Keıinnen aqynmen kezdesip te qalyp júrdik. Arnaý óleń jazýdy kópten kásipke aınaldyrǵan sekildi. Onysyn ózi sóket kórmeıtindeı. Nesi bar, «Qazanshynyń erki bar, qaıdan qulaq shyǵarsa» degen ǵoı.
Iá, aǵaıyn, ómirde ne bolmaıdy. Alda-jalda arnaý óleń jazǵysh aqyndy kóre qalsańyz, áste tań qalmaı-aq qoıyńyz...
Káribaı ÁMZEULY,
zeınetker
Ońtústik Qazaqstan oblysy,
Sozaq aýdany