Kún sanap ósip kele jatqan Taldyqorǵan qalasynda bir kúnde eki birdeı keshen iske qosyldy. Alǵashqysy – Saltanat saraıy. Jastardyń neke qııý saltanatyn, túrli basqosý, jıyndar ótkizýge, halyqaralyq kelisimsharttar jasaýǵa laıyqtalyp jasalǵan sáýletti orynnyń ashylý saltanaty da erekshe boldy deýge turady. Alǵashqy neke qıylyp, altyn jáne laǵyl toılary toılandy.
– Jastarymyz jańa ómirge osyndaı ásem saraıda qadam bassyn degen nıetpen Saltanat saraıyn turǵyzyp otyrmyz. Bul isti qolǵa almas buryn Elbasynyń ruqsatyn surap, batasyn alǵan edim. Oblysymyzda áli talaı záýlim ǵımarattar salynady. Keler jyly teatrdyń jańa ǵımaratyn, júzý basseınin ashamyz. Munyń ıgiligin halqymyz, jastarymyz kóredi. Al búgingi bas qosyp otyrǵan jastarǵa baqyt tileımin, árdaıym bir-birińdi syılap, qoldap, qorǵap júrińder. Sonda bári jaqsy bolady. Búgin altyn, laǵyl toılaryn ótkizýge kelgen juptardyń jolyn bersin deımin. Qosaqtaryńmen qosa aǵaryp, kóp balaly bolyp, qazaqtyń sanyn kóbeıte berińder. Qarııalarymyzǵa árdaıym jastarymyzǵa úlgi-ónege bolyp, nemere-shóberelerińizdiń qyzyǵyn kórińizder demekpin, – dep tilegin arnaǵan oblys ákimi Amandyq Batalovtyń quttyqtaýynan keıin, Saltanat saraıynyń tusaýkeserimen birge nekesi qıylǵan jastarǵa neke kýáligi tapsyryldy.
Ekinshisi – 4,5 myń sharshy metrdi alyp jatqan Kórme kesheni. Qurylysyna bıýdjetten 1,3 mlrd teńge qarjy jumsalypty. Syrtqy kórinisi alystan kóz tartatyn nysanǵa jumsalǵan otandyq jáne sheteldik materıaldardyń sapasy da joǵary deńgeıde. Oblys ortalyǵynyń shyraıyn kirgizip, ajaryn asha túsetin qurylys aldaǵy kúnde qala turǵyndary men qonaqtarynyń eń kóp atbasyn burar ortalyǵyna aınalady degen senim bar. Lentasy qıylyp, esigi ashylǵan saltanatty jıyndy óńir basshysy Amandyq Batalov quttyqtaý sózimen bastady:
– Oblystaǵy ekonomıka, aýyl sharýashylyǵy, medısına, bilim, mádenıet, taǵy da basqa saladaǵy ozyq tehnologııalar men dúnıelerdi, óner týyndylaryn halyqqa kórsetý, nasıhattaý, sol arqyly bolashaq urpaqqa sara jol salý maqsatynda boı kótergen ǵımarattyń tabysty bastamalarǵa jol ashatynyna senimdimin. Munda qalalyq, oblystyq, respýblıkalyq, tipti halyqaralyq sharalardy da ótkizýge bolady. Osy ǵımaratty ashý arqyly kórme qyzmetiniń jańa múmkindikterine jol ashýmen qatar, ózimizde óndiriletin taýarlar men qyzmetterdi keshen qabyrǵasynda kópshilikke usyný arqyly óńirimizdiń ınvestısııalyq tartymdylyǵyn da eseleı alamyz. Qalamyz mundaı Kórme pavılonymen maqtana alatynyna senimdimin, – dedi ákim.
Sáýletti ǵımarattyń qurylysyn júrgizgen – «Stroıservıs-97» JShS. Ǵımarat qalanyń kireberisinde ornalasqandyqtan, qalaǵa kelýshilerge á degennen jaqsy áser qaldyrý jaǵyna basa nazar aýdarylǵan. Kórme keshenin aralap shyqqan basshylyq tarapy sáýletti kórinisine de, qurylystyń sapasyna da joǵary baǵa berdi.
Bul ǵımaratqa aldaǵy ýaqytta oblystyq «Atameken» kásipkerler palatasy, kásipkerlerge qyzmet kórsetý ortalyǵy, «Bıznes-mektep», bıznes-ınkýbator sııaqty mekemeler ornalasady. Bul mekemeler áý bastaǵy josparǵa sáıkes Jetisý óńirin kórkeıtý, qala halqyn kásiptendirý jolynda jumys isteıtin bolady. Nysannyń ashylý saltanatynda uıymdastyrylǵan alǵashqy kórmege Taldyqorǵandaǵy «Qaınar-AKB» JShS, «Ajar» tigin fabrıkasy, Halyq banki men Sberbank ujymdary bastaǵan kásiporyndar shyǵaratyn hám tutynatyn taýarlar qoıyldy. Mundaı kórmeler endigi ýaqytta jıi-jıi uıymdastyrylyp turatyn bolady. Sebebi óńirdiń kórkeıip, damýyna yqpalyn tıgizetin qandaı bastama da eldiń nazarynan tys qalmaýǵa tıis.
Almas NÚSIP, «Egemen Qazaqstan»
Almaty oblysy