Oǵan Qazaqstannyń birneshe oblystarynan delegattar keldi, sonymen qatar Ońtústik Koreıanyń Qazaqstandaǵy Tótenshe jáne ókiletti elshisiniń orynbasary Han Man Chýn men Qazaqstan koreıleri qaýymdastyǵynyń tóraǵasy Sergeı Ogaı qonaq retinde qatysty.
Qazaqstan koreı jastary qozǵalysy uıymy belsendi jumys isteıdi. Ol Qazaqstan koreıleri qaýymdastyǵy josparlaǵan sharalardyń barlyǵyna qatysyp otyrady, bıyl sondaı 20 sharany júzege asyrǵan. Ásirese, Astanada ótken Qazaqstan-Koreı yntymaqtastyǵy forýmyna da atalǵan jastar uıymy atsalysty. Forýmda Qazaqstan halqy Qostanaı oblystyq assamblesy tóraǵasynyń birinshi orynbasary-hatshysy Majıt Shúlenov, Ońtústik Koreıanyń Qazaqstandaǵy Tótenshe jáne ókiletti elshisiniń orynbasary Han Man Chýn, Qazaqstan koreıleri qaýymdastyǵynyń tóraǵasy Sergeı Ogaı, Qostanaı oblystyq koreı etno-mádenı qoǵamdyq birlestiginiń tóraǵasy Igor Kım jastardy quttyqtap sóz sóıledi.
«Eki el arasyndaǵy yntymaqtastyq damyp otyr. Bizdiń dıplomatııalyq qarym-qatynasymyzdyń bastalǵanyna 25 jyl toldy. Jastarsyz qaı ulttyń da bolashaǵy joq. Eki el arasyndaǵy ekonomıkalyq, saıası, mádenı jáne sporttyq qatynastardy óristetetin jastar sizdersizder» dedi Han Man Chýn.
Búginde, Qazaqstanda koreı ultynyń tórtinshi urpaǵy turyp jatyr. Qazaqstan koreıleri qaýymdastyǵynyń tóraǵasy Sergeı Ogaı jastar qozǵalysynyń tamasha bastamalaryn kórgisi keletinin aıtty. Qaýymdastyq bıyl áleýmettik rolıkterge baıqaý jarııalaǵan bolatyn. Alty aıdyń ishinde oǵan 200 jumys túsken, sonyń 30-y iriktelip, baıqaýǵa qatysty. Sonyń arasynda birinshi jáne ekinshi oryndy qostanaılyq jastar jeńip aldy. Forýmda olardyń jumysy kórsetilip, Batyr Ospanov pen Kırıll Kogaıǵa júldeleri tapsyryldy.
Munan keıin Sergeı Gennadevıch forýmǵa jınalǵan jastarmen májilis ótkizdi, olardyń pikirlerin tyńdady, jastardy bastamalar kóterip, túrli jobalar jasaýǵa shaqyrdy. Forým aıasynda trenıng, toptarǵa bólinip tájirıbelik jumystar júrgizildi. Jastar sharasy ádettegideı kóńildi konsertpen aıaqtaldy.
Názıra Járimbet,
«Egemen Qazaqstan»
Qostanaı
Sýretti túsirgen Baǵdad Ahmetbekov