Búgin «Egemen Qazaqstan» respýblıkalyq gazetiniń ǵımaratynda Ulttyq ınternet assosıasııasy uıymdastyrǵan «BAQ qoǵamdaǵy quqyq buzýshylyqqa «múldem tózbeýshilikti» qalyptastyrý quraly retinde» atty konkýrstyń qorytyndysy boıynsha quttyqtaý rásimi ótti.
Ǵalamtor tilin qazaqshalaýdy, bılik pen buqaranyń arasyn ınternet arqyly jaqyndastyrýdy kózdeıtin Ulttyq ınternet assosıasııasy bıyl 21 shildeden bastap «BAQ qoǵamdaǵy quqyq buzýshylyqqa «múldem tózbeýshilikti» qalyptastyrý quraly retinde» atty jobany júzege asyra bastaǵan bolatyn. Osy joba aıasynda atalǵan uıym 21 qyrkúıek pen 13 qarasha aralyǵynda quqyqtyq saýattylyqqa baılanysty ózekti máselelerdi saıtta jáne áleýmettik jelilerde jarııalaǵan jýrnalıster men blogerler arasynda konkýrs jarııalady.
«Ulttyq ınternet assosıasııasy» zańdy tulǵalar birlestiginiń prezıdenti Serikqazy Kákibalanovtyń aıtýynsha halyq quqyǵynyń buzylýyna jol bermeı, olardyń zańdyq saýatyn arttyrýǵa jáne qoǵamda qylmystyń azaıýyna úles qosý maqsatynda úsh nomınasııa boıynsha uıymdastyrylǵan baıqaýǵa 100-den asa materıal kelip túsipti.
«Úzdik maqala» nomınasııasy boıynsha 1-oryndy Aıbek Qabdeshov jeńip alsa, 2-oryndy Aqbota Ahmet ıemdendi. Ermek Isabaev osy atalymnyń 3-oryn ıegeri atandy. «Úzdik vıdeomaterıal» nomınasııasynyń 1-orny Aleksandra Mılıchkınaǵa berilse, 2-oryndy Juldyz Jasuzaq aldy. 3-oryn Azamat Erǵalıevqa buıyrdy. Al «Áleýmettik jelidegi úzdik jazba» nomınasııasynda 1-oryn Serik Erǵalıǵa, 2-oryn Janar Nuryshevaǵa, 3-oryn Sátjan Káripbaevqa berildi.
Jeńimpazdarǵa Ulttyq ınternet assosıasııasy dıplomdarmen qosa smartfondar tabys etse, «Egemen Qazaqstan» respýblıkalyq gazeti Ábish Kekilbaevtyń «Dáýir daýysy» kitaby men Sherhan Murtazanyń «Namys naızaǵaı» kitaptaryn syılady.
Marapattaý kezinde sóz alǵan Azamattyq bastamalardy qoldaý ortalyǵy dırektorynyń orynbasary Gúlnár Oralova jeńimpaz jýrnalıster men blogerlerdiń eńbegin joǵary baǵalap, olardyń quqyqtyq memleket qurýǵa úles qosyp jatqanyn aıtty. Sondaı-aq syılyq tabystaýǵa qatysqan Aqytbek Sherızatuly Qytaıdaǵy ınternet qaýipsizdigine toqtalyp, ondaǵy áleýmettik jeliler men kez kelgen saıttarǵa tek qana shynaıy atpen jáne qujat nómiri arqyly ǵana tirkele alatynyn jetkizdi.
Ulttyq ınternet assosıasııasy júrgizip otyrǵan bul jobany QR Din isteri jáne azamattyq qoǵam mınıstrligine qarasty Azamattyq bastamalardy qoldaý ortalyǵy grant arqyly qarjylandyrdy.
Maıgúl SULTAN,
«Egemen Qazaqstan»