Búgin Shymkent qalasynda Orta Azııadaǵy alǵashqy qýaty 0,5 megavatty quraıtyn «Bıogaz qondyrǵylar kesheni» iske qosyldy. Qazaqstandaǵy biregeı joba Elbasymyzdyń jarlyǵymen qabyldanǵan «Jasyl ekonomıkaǵa kóshý tujyrymdamasyn» oryndaý maqsatynda iske asyrylyp otyr, dep habarlaıdy OQO ákimdiginiń baspasóz qyzmeti.
Ashylý saltanatyna qatysqan oblys ákimi Janseıit Túımebaev bul joba EKSPO-2017 halyqaralyq mamandandyrylǵan kórmede Ońtústik Qazaqstan oblysynan usynylyp kórsetilgenin aıtty.
«Qondyrǵylar kesheninde halyqaralyq kórmede usynylǵan Chehııalyq «HEDVIGA GROUP» kompanııasynyń jańa tehnologııalary qoldanyldy. Tehnologııanyń ereksheligi qalanyń sarqyn sýlardy tazalaý ǵımaratynan shyqqan shógindilerdi óńdep, odan bıogaz alyp qoldaný arqyly, jylý jáne elektr energııalaryn óndirý bolyp otyr. Nátıjesinde bul tehnologııa syrtqy ortanyń lastanýyn edáýir tómendetip ekologııany jaqsartýǵa úlken úles qosady. Jalpy oblysta jańǵyrmaly energııa kózderi salasyn damytý basty nazarǵa alynǵan. Mysaly, oblysta jalpy qýaty 183,9 megavatt bolatyn 14 jobany iske asyrý josparlanǵan. Búginde onyń 4 jobasy júzege asyryldy», dedi ákim.
«Sý resýrstary - marketıng» JShS ınısıator bolǵan bul jobanyń quny 2 mlrd. 200 mln. teńge. Tehnologııalyq proseske sáıkes qondyrǵy qaldyqtardy óńdeý arqyly táýligine 300 m3 metandy gazdy (bıogaz) óndiredi. Munda 20 adam turaqty jumys ornymen qamtylyp otyr. Sonymen qatar, óndirilgen energııa kásiporynnyń jylý energııasyna qajettiligin tolyǵymen, al elektr energııasyna qajettiliginiń 50 paıyzyn jabatyn bolady.
Jalpy oblys kóleminde Memleket basshysynyń jańa energetıkany damytý tapsyrmasyna sáıkes jobalar kezeń-kezeńimen júzege asyrylýda. Máselen, oblysta jalpy qýaty 183,9 megavatt bolatyn 14 jobany iske asyrý josparlansa, búginde onyń 4 jobasy júzege asyryldy. Al osy jyldyń sońyna deıin Qazyǵurt aýdanynda Dostyq shaǵyn sý elektr stansııasy iske qosylady. Budan bólek, Saryaǵash aýdany, Jylǵa aýyldyq okrýginde qýaty 20 MVt «Jylǵa» jáne Maqtaral aýdany, Jetisaı qalasy mańynda qýaty 5,0 MVt eki kún elektr stansııalarynyń qurylys jumystary bastaldy.