«Astana» komandasynyń bas bapkeri Stanımır Stoılov Eýropa lıgasynyń toptyq kezeńi aıasynda Ispanııanyń «Vılıarrealyna» qarsy oıyn jaıly oı bólisti.
– Bul tartysqa toly, qıyn oıyn ekeni belgili. Qazir topta úsh komandanyń pleı-offqa shyǵatyn múmkindigi bar. Men ylǵı da ıspanııalyqtardy favorıt retinde sanap keldim. «Vılıarreal» Ispanııanyń úzdik bes komandasynyń biri. Birneshe jyl buryn ıspanııalyqtar bizdiń osal tustarymyzdy ashyp kórsetken bolatyn. Odan beri biz biraz tájirıbe jınadyq. Erteń jankúıerlerimizdiń aldynda barymyzdy salatyn bolamyz. Qajet nátıjege qol jetkizý úshin aıanyp qalmaımyz.
– «Aqjaıyqqa» qarsy oıynnan keıin syıaqy máselesi týraly sóz qozǵap edińiz. Sol másele qazir sheshimin tapty ma? Osyǵan baılanysty oıynshylardyń kóńil-kúıi týraly oı bildirseńiz.
– Jaǵdaı áli ózgergen joq. Eshkimniń qaryzy tólenbedi. «Samuryq-Qazynadan» ázirge kelip eshkim eshnárse túsindirmedi. Shákirtterimniń oıynda ne baryn bilmeımin. Biraq bul máselege qaramastan oıynshylarym erteń joǵary deńgeıde oınap shyǵady dep úmittenemin. Qazaqstanda bir jyldan astam ýaqyt syıaqy almaǵan jalǵyz komandamyz dep oılaımyn.
– Marca basylymynyń tilshisi «Vılıarreal» «Astanadan» utylýy múmkin degen aqparat tarady. Ol tilshi qandaı aspektilerge súıenip aıtty dep oılaısyz?
– Shynymdy aıtsam, bizde aıtarlyqtaı artyqshylyq joq. «Vılıarreal» qaı jaǵynan bolsyn bizden deńgeıi joǵary. «Astana» oıynshylary eýropalyq fýtboldyń deńgeıine saı óner kórsete alady. Bálkim sol shyǵar! Sondaı-aq, eń basty artyqshylyǵymyz – jankúıerlerimizdiń aldynda óner kórsetemiz.
– Qazaqstanda aıtarlyqtaı nátıje kórsetpese de jalaqysyn da, syıaqysyn da ýaqytynda alyp otyrǵan komandalar bar. Elimizdi Eýropaǵa tanytyp júrgen komandanyń mundaı jaǵdaıǵa tap bolǵany ókinishti. Klýb basshylyǵy bıyl ǵana syıaqy tólemeı otyr ma?
– Shynymdy aıtsam, syıaqy máselesi maǵan da unamaı otyr. Mundaı mańyzdy oıyn aldynda biz qarjy týraly sóz qozǵap otyrmyz. Kez kelgen bapker mundaı jaǵdaıdy qalamas edi. Bul másele tezirek sheshimin tabýy tıis. Biz aldaǵy oıynǵa kóbirek kóńil bólýimiz kerek. Erteńgi oıynnyń nátıjesine bul másele kedergi keltirmeıdi dep úmittenemin.
– «Astananyń» oınamaǵanyna 20 kúndeı ýaqyt boldy. Al ıspanııalyqtar kerisinshe ár úsh-tórt kún saıyn alańǵa shyǵyp júr. Bul qıyndyq týdyrmaı ma?
– 20 kún shynymen uzaq ýaqyt. Osy ýaqyt aralyǵynda komanda óz rıtminen jańylyp qalýy múmkin. Bul úshin men de alańdap otyrmyn. Eger jıi alańǵa shyǵyp tursa, deńgeıin de ustap otyrar edi. «Vılıarrealdyń» bul turǵyda jaǵdaıy jaqsyraq. Fýtbolshylary ulttyq quramanyń da oıyndaryna qatysty. Biraq erteń komandam óz minezin kórsetip, tıisti deńgeıde oınaıdy dep úmittenemin. Biz mundaı jaǵdaıǵa birinshi ret tap bolyp otyrǵan joqpyz.
Aıta keteıik, «Astana» men «Vılıarreal» arasyndaǵy kezdesý erteń, ıaǵnı 23 qazan kúni «Astana-Arena» stadıonynda 22:00-de bastalady.
Aıan ÁBDÝÁLI, «Egemen Qazaqstan»