Astanada Qazaqstan kásipodaqtary federasııasy Bas keńesiniń otyrysy ótti.
Jıynda uıym jetekshiliginde oryn alǵan ózgerister belgili boldy. Qazaqstan kásipodaqtary federasııasynyń tóraǵasy bolyp Baqytjan Ábdiraıymov saılandy. Baqytjan Jarylqasynuly – Qazaqstan Respýblıkasy Parlamenti Májilisiniń depýtaty, Zań jáne sot-quqyq reformalary jónindegi komıtetiniń múshesi. Sondaı-aq halyqaralyq Túrki álemi Zańgerleri qaýymdastyǵynyń prezıdenti jáne halyqaralyq zańgerler odaǵy Úılestirý keńesiniń múshesi.
Otyrysta federasııanyń burynǵy basshysy Ábilǵazy Qusaıynov sońǵy jyldary túrli saladaǵy eki mıllıonnan astam qyzmetkerlerdiń basyn qosqan birlestiktiń eńbek ujymdaryndaǵy turaqtylyqty saqtaýda, jumysshylardy áleýmettik kepildik pen eńbekaqy tólemimen qamtamasyz etýde joǵary nátıjelerge qol jetkizgenin jáne 2015 jyly Qazaqstan kásipodaqtary federasııasy halyqaralyq kásipodaqtar federasııasynyń tolyq múshesi atanǵanyn aıtty.
– Atalǵan birlestik 162 eldiń 176 mıllıon qyzmetkeriniń basyn biriktirip otyrǵan álemdik iri uıymdardyń biri. Bul elimizde «memleket – jumys berýshi – jumysshy» tizbegi boıynsha eńbek máselelerine arnalǵan tıimdi suhbat alańynyń qalyptasqanyn kórsetedi, dedi ol. Sóziniń sońynda Á.Qusaıynov qoldaý kórsetip, senim tanytqan Memleket basshysyna jáne birge qyzmet etken ujymdaǵy áriptesterine rızashylyǵyn jetkizdi. О́z kezeginde federasııa quramyna enetin salalyq jáne aýmaqtyq birlestikterdiń ókilderinen quralǵan otyrysqa qatysýshylar da Á.Qusaıynovqa jemisti jumysy úshin alǵys aıtty.
Dýman ANASh, «Egemen Qazaqstan»