Qala ákimi Nurjan Áshimbetov pen «Oblystaǵy kólik tasymaldaýshylarynyń odaǵy» assosıasııasynyń prezıdenti Vasılıı Rýdakov pavlodarlyq stýdentterge qoǵamdyq kólikte tegin júrýge múmkindik beretin shartqa qol qoıdy.
Memorandýmǵa sáıkes tehnıkalyq kásibı bilim beretin kolledjderde, joǵary oqý oryndarynda oqıtyn stýdentterdiń tórt toby avtobýstar men travaılarda tegin júre alady. Olardyń qatarynda ata-anasynyń qamqorlyǵynsyz qalǵan, az qamtamasyz etilgen, kóp balaly otbasylardyń ul-qyzdary, jetimder men I, II toptaǵy múgedek stýdentter bar. Al qalǵandary «Stýdenttik jol júrý bıletin» satyp alý arqyly qoǵamdyq kólikte 50 paıyz jeńildikpen júrý quqyǵyn ıelenedi.
- Bizdiń alatyn stıpendııa úshin bul jaqsy jeńildik. Tipti, qazir 4-5 myń teńge kóp aqsha bolmasa da, bul aqsha ashanada tamaq ishýge múmkindik, - deıdi stýdentter.
Bul qujat 2018 jyldyń 1 qańtarynan bastap kúshine enedi. Endi oblys ortalyǵynda bilim alyp júrgen 20 myńnan astam stýdent qoǵamdyq kólikte jeńildikpen júretinderine qýanyshty. Oblystyq ákimdik Ekibastuz, Aqsý qalalarynda da stýdentterdiń jeńildikpen júrý múmkindigin qarastyrýda.
Farıda Byqaı,
«Egemen Qazaqstan»
Pavlodar