Búgin «Jańǵyrǵan aýyl» jobasy aıasynda Moıynqum, T.Rysqulov, Sarysý jáne Baızaq aýdandarynyń ákimderi, sondaı-aq aýyldyq okrýg ákimderi jáne demeýshiler arasynda úshjaqty memorandýmǵa, sondaı-aq Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń aıasynda «Týǵan jerge týyńdy tik!» aksııasy boıynsha jalpy quny 500 mıllıon teńge bolatyn segiz memorandýmǵa da qol qoıyldy.
Sonymen qatar Taraz qalasyndaǵy «Dostyq úıinde» aýdandyq mańyzy bar qala, aýyldyq okrýgter jáne aýyl ákimderine arnalǵan arnaıy semınar-keńes ótti. Munda qarjy-ekonomıkalyq saıasattyń ózekti máseleleri, aýyl sharýashylyǵy salasynyń ózekti máseleleri, kásipkerlikti damytý, týrızm, eńbek qatynastarynyń ózekti máseleleri jáne ınfraqurylymdy damytý, sondaı-aq densaýlyq saqtaý salasynyń ózekti máseleleri sóz boldy. Atalǵan semınar-keńesti Jambyl oblysy ákiminiń birinshi orynbasary Bekbolat Orynbekov ashyp, jergilikti memlekettik jáne ózin-ózi basqarýdy odan ary damytýdyń mańyzdylyǵyna toqtaldy. «Búginde Memleket basshysy tarapynan jergilikti ózin-ózi basqarý máselesine basa nazar aýdarylýda. Onyń aıqyn dáleli retinde Elbasynyń «100 naqty qadam» Ult josparynyń memlekettik apparat qalyptastyrý dep atalatyn besinshi bóligindegi esep beretin aýyldyq okrýg, aýyl, aýdandyq mańyzdaǵy qala deńgeıinde jergilikti ózin-ózi basqarýdyń derbes bıýdjetin aıtsaq ta bolady», dedi ol óz sózinde.
Sonymen qatar barlyq deńgeıdegi ákimderge memlekettik qyzmettiń jańa modeli týraly, respýblıkalyq jáne jergilikti bıýdjettiń kiris bóligin oryndaý máseleleri, sondaı-aq jergilikti atqarýshy organdardaǵy oryndaýshylyq tártip máseleleri týraly baıandamalar oqylyp, qoıylǵan suraqtarǵa baıandamashylar tarapynan jaýap berildi. Semınar-keńes barysynda Bekbolat Orynbekov Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgen tapsyrmalardy aýdandyq mańyzy bar qala, aýyldyq okrýgter jáne aýyldarda qalaı iske asyrý kerektigine de toqtaldy. Sondaı-aq, Elbasy maqalasynda aıtylǵan latyn álipbıine kóshý, «Týǵan jer», «Qazaqstandaǵy 100 jańa esim», «Qazaqstannyń qasıetti rýhanı qundylyqtary» jobalaryn iske asyrý jaıy da talqylandy.
Hamıt Esaman,
«Egemen Qazaqstan»
Jambyl oblysy