Áskerı-patrıottyq tárbıe qashan da qajet

Sharaǵa Parlament depý­tat­tary, Qarýly Kúshter qatar­ynda qyzmet etetin sala ma­mandary, memlekettik organ­dardyń ókilderi men ás­kerı-patrıottyq klýbtardyń jáne kadetter klasynyń tárbıelenýshileri qatysty.

Kezdesýdegi sózinde senator D.Nazarbaeva jas­tar arasynda patrıottyq tár­bıe júrgizý arqyly joǵa­ry rýhanı-patrıottyq qasıet­terdi, Otan aldyndaǵy mindet­terin tereń seziný men azamat­tyq jaýapkershilik sezimin qalyptastyrý – memle­ket­tik organdardyń, jastar uıym­darynyń, otbasy men qoǵamnyń maqsatty jáne jumyla áreket etýin talap etetinin atap ótti. «Oqý­shylardyń aqyl-oı, rýhanı jáne kúsh-qýat áleýetin iske asyra alatyn mektepterdegi áskerı-patrıottyq klýbtar osy baǵyttaǵy mańyzdy mıssııany atqarady. Mektep ishindegi osyndaı qurylymdar sany jyldan-jylǵa artyp keledi. Bul bolashaq patrıottar tárbıeleýge óte jaqsy múmkindik jáne ony barynsha paıdalanýǵa bolady», dedi Senat komıtetiniń tóraǵasy.

Al jıynǵa jetekshilik etken Qorǵanys mınıstri Sáken Jasuzaqov bıylǵy jyldyń aqpan aıyndaǵy kezdesýde Memleket basshysy mindettegen tapsyrmalar salada óz deńgeıinde júzege asyrylyp jatqanyna toqtaldy. «Bizdiń búgingideı basqosýymyzdyń jastarǵa áskerı-patrıottyq tálim-tárbıe berýde mańyzy zor. Osy maqsatta mundaı sharalarǵa ardager áskerı mamandarymyz ben áskerıler otbasyn jáne óziniń qyzmettik boryshyn minsiz atqaryp júrgen jandardy meılinshe kóbirek qatystyrýǵa tyrysýdamyz. Sebebi olar bizdiń salanyń maıtalman mamandary. Sondyqtan da biz ondaı azamattardy qaı kezde de keıingi tolqynǵa úlgi-ónege ete alamyz. Ásirese, elimizde jas áskerıler legin qalyptastyrý men olardyń pikir almasyp, tájirıbemen bólisý alańqaılaryn uıym­das­tyrý qaı jaǵynan alsaq ta utymdy», dedi S.Jasuzaqov.

Búginde respýblıka boıynsha 101 kadetter klasy ashy­lyp, ol jerlerde 2 800-den astam jasóspirim bilim alýda. Mınıstrdiń málim­deýinshe, kadetter klasynyń tárbıelenýshileri áskerı salanyń negizin oqýmen qatar, mentaldi arıfmetıka, bal bıi, salt atpen júrý, qoıan-qoltyq urys pen ádep, shet tili syndy salaǵa qatysty tártip-talaptardy oqyp, úırenedi. 

Kezdesýdi qorytyn­dy­laǵan Parlament Sena­tynyń depýtaty Darıǵa Nazarbaeva elimizde árbir aza­mat úshin beıbitshilik pen turaq­tylyqtyń mańyzy erekshe ekenin alǵa tartty. «Búgingi tańda biz salıqaly saıasat ustanǵan turaqty bıligi bar yntymaǵy jarasqan beıbit elde ómir súrip jatyrmyz. Al órkenıetke qulash urǵan qazirgideı zaman talaby qyzyq ári qıyndyqtarǵa toly. Tipti, bilim alyp, qyzmet isteımin, aıqyn maqsatyma jetemin dep bolashaǵyńdy josparlaı alýdyń ózi jas áskerlerimiz úshin zor baqyt», dedi senator. Sondaı-aq ol kezdesýge kelgen jas jaýyngerler nazaryn azamattyq paryz ben jaýapkershilikti seziný qabiletin qalyptastyrý máse­lesine de aýdardy. «Belgili bir deńgeıde qol jetkizgen jetis­tikterimizdi eseleı túsý úshin bizge jas áskerı qury­lym­dardy memlekettik deńgeıde da­mytý men qoldaý boıynsha biregeı respýblıkalyq baǵ­darlama qajet», dedi D.Nazarbaeva.

Jıyn sońynda Qorǵanys mınıstri S.Jasuzaqov senator D.Nazarbaevaǵa «El qor­ǵany» birinshi dárejeli ve­domstvolyq medalin tapsyrdy. Sonymen qatar kezdesýge qatysýshy taraptar arasynda elimizdegi áskerı-patrıottyq jumysty odan ári jetildirý boıynsha yntymaqtastyq pen ózara árekettestik týraly memorandýmǵa qol qoıyldy.

Nurlybek DOSYBAI, «Egemen Qazaqstan»