Eldik maqsat qazaqty uly jolǵa salǵaly da shırek ǵasyrdan asyp barady. Osy jolda rýhymyzdy asyrǵan, ar-ojdanymyzǵa aınalǵan rámizderimizdiń jóni bólek. Tórtkúl dúnıeniń tórinde kók Týymyz tik shalqyp, kıeli shańyraqtan kún nury shashylyp, qanatty pyraqtarymyz beınelengen Eltańbamyz tórden oryn alyp, oń qolymyzdy júrek tusyna shegelegen Ánuranymyz memlekettiń sımvoly, birliktiń altyn tuǵyry sanalǵaly qashan.
Sol altyn tuǵyrymyzdy jas urpaqtyń sanasyna sińirip, oıyna uıalatý maqsatynda Elbasynyń rýhanı jańǵyrý maqalasyndaǵy ıdeıasynyń irgesin bekitý isinde, Tuńǵysh Prezıdent kúnine oraı «Memlekettik rámizder jáne eldik murattar» degen taqyrypta Eýrazııa ulttyq ýnıversıtetinde dóńgelek ústel ótti. Onda el rámizderi men rámiz tanýshy týraly jan-jaqty áńgime boldy. Mundaı ıgilikti iske uıytqy bolǵan irgeli oqý ornynyń praktıkalyq qazaq tili kafedrasy ekenin aıta ketelik.
Dóńgelek ústelge jınalǵan ustazdar men oqýshylarǵa memlekettik Eltańbamyzdyń avtory, kórnekti sáýletshi Jandarbek Málibekov rámizderimiz týraly oı qozǵap, bul eldik iske Elbasy Nursultan Nazarbaevtyń erekshe eńbegi sińgenin atap aıtty. «Máselen, bir ǵana detaldy aıtar bolsam, keıbir halyq qalaýlylary Eltańbanyń joǵary jaǵynda turǵan juldyzǵa kúdikpen qaraǵanda, Prezıdent ultymyzdyń juldyzyń jansyn, juldyzyń joǵary bolsyn degen sózderin dáıekke keltirdi. Múıizdegi jeti saqınaǵa da erekshe mán bergeni este. Al Týǵa kelgende árkez bir tústi bolsa degendi tilge tıek etip júrdi.
Búgingi kók Týymyz jelbiregende ony qup alyp, ulttyq ornamentti usynǵany halyqtyń esinde. Bul jumysta ult zııalylary S.Zımanov, S.Sartaev, Á.Kekilbaev, ózge de azamattar az eńbek etken joq», dedi. Ol sondaı-aq qazaqtyń ardaqty azamaty Aqseleý Seıdimbektiń «Ulttyq rámizderdi ǵylymı negizdegen Erbol Sháımerdenuly», degen pikirin ortaǵa salyp, el rámizderin alǵashqy kezde óz jurtymyzǵa jetkizýde, keıin álemdik deńgeıde taralýyna Erboldyń sińirgen eńbegine dáıekter keltirdi.
Ár jyl saıyn rámizder kúni atalyp ótetin tusta alǵashqy rámiztanýshy Erbol Sháımerdenuly oqýlaryn ótkizýdi usynyp, oǵan ózi qoldaý kórsetetinin, tipti batasyn berýge ázir ekenin jetkizdi. Ol sonymen qatar osy dóńgelek ústel sonyń alǵashqy bastaýy degen oıyn da ortaǵa saldy. Belgili jazýshy Qýanysh Jıenbaı rámizder týraly oı qozǵaı kelip, Erbol Sháımerdenulynyń úsh tilde shyqqan qazaq rámizderi týraly kitaptary shet memleketterdegi Qazaqstan elshilikterinen oryn alǵanyn, ózge jurttyń adamdary sol kitaptardan ulttyq rámizderimizdi tanyp-bilip jatqanyna mysaldar keltirdi.
Ustazdar men stýdentter Eltańba avtoryna alýan túrli suraqtar qoıyp, tushymdy jaýaptar aldy. Stýdent Dıara Dúısebek «Biz rámizderimizdiń avtoryn keıde bile almaı jatatynymyz bar. Olardy tanytý jaıyn da qolǵa alý kerek sekildi. Rámiz avtorlary týraly derekti fılmder túsirip, árkez kórsetip otyrsa», degen tilegin jetkizip, qazir Tý avtorynyń ómirde joq ekenin, endigi jerde ortamyzda otyrǵan Jandarbek Málibekov jaıly beınetaspalardy shyǵarsaq utylmas edik degen pikirin de talqyǵa usyndy.
Dóńgelek ústelge jınalǵandar rámizderimiz – rýhymyz, ar-ojdanymyz degen baılam jasaldy.
Súleımen MÁMET, «Egemen Qazaqstan»