Qazaq memlekettik qyzdar pedagogıkalyq ýnıversıtetinde «Til parasat» respýblıkalyq baıqaýy ótti. Qazaq tilin jetik meńgergen etnos jastary arasynda uıymdastyrylǵan saıys joǵary oqý oryndarynyń stýdentteriniń arasynda júrgizildi. Bul týraly Qyzdar ýnıversıtetiniń baspasóz qyzmeti habarlady.
Sharany uıymdastyrýshy – Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń tapsyrmasymen Sh. Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy. Maqsat – qazaq tiliniń qoldanylý aıasyn keńeıtý, til mádenıetin kóterý, etnos ókilderin yntalandyrý jáne talantty jastardy anyqtap, qoldaý kórsetý.
Baıqaýdyń ashylý rásiminde sóılegen belgili qoǵam qaıratkeri, Shaısultan Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektorynyń orynbasary Orazkúl Asanǵazyqyzy osy taqilettes saıystar memlekettik tildiń kósegesin kógertýge zor yqpal etetindigin jetkizdi.
– Elimiz táýelsiz el atanǵanyna jıyrma alty jyldyń júzi boldy. Osy jyldar aralyǵynda Qazaqstan ótpeli kezeńdi basynan ótkergeni barlyǵymyzǵa belgili. Táýelsizdik jyldarynda eń kóp aıtylǵan hám jazylǵan taqyryptyń biri – memlekettik tildiń ahýaly. Dese de Keńes Odaǵy tusyndaǵy jaǵdaıǵa qaraǵanda shúkirshilik aıtarlyqtaı. Bul tarapta birqatar sharýa atqarylyp, naqty bastamalar qolǵa alyndy. Istelgen jumystar da jeterlik. Memlekettik tilimizdiń mártebeli tuǵyryna tolyq qonýy úshin bizdiń ortalyq ta aıanyp qalmaı, júıeli jumystar júrgizýde. Bul is-shara da sonyń bir parasy, – dedi O. Asanǵazy.
Baıqaýǵa 17-22 jas aralyǵyndaǵy oblystyq jáne qalalyq irikteý kezeńderiniń jeńimpazdary qatysyp, baqtary men baptaryn synady. Saıys kezeńderinde úmitkerler usynylǵan taqyryp boıynsha aýyzsha tusaýkeser, qazaqsha esse jazý, dıalog qurý jáne «Shabyt juldyzy» atty shyǵarmashylyq tapsyrmalardy oryndaý boıynsha básekege tústi.
Qatysýshylardyń bilimi men biligin, óneri men óresin belgili fılolog ǵalymdardan quralǵan qazylar alqasy baǵalady. Olardyń qatarynda fılologııa ǵylymdarynyń doktory, professor Temirhan Tebegenov, Sh. Shaıahmetov atyndaǵy respýblıkalyq úılestirý-ádistemelik ortalyǵy dırektorynyń orynbasary Orazkúl Asanǵazy, A. Baıtursynuly atyndaǵy Til bilimi ınstıtýtynyń bólim meńgerýshisi, fılologııa ǵylymdarynyń doktory Orynaı Jubaeva, Qazaq ulttyq salt-dástúrleri akademııasynyń professory, kompozıtor Kentaý Qýantaıuly jáne qazaqstandyq Ulttyq IýNESKO klýbtary Federasııasynyń vıse-prezıdenti Ǵanı Beısembaev bar.
Tartysty ótken baıqaý qorytyndysy boıynsha jeńimpaz atanǵandar dıplom, Alǵys hattarmen jáne baǵaly syılyqtarmen marapattaldy.