Jambyl vagon deposynda qyryq jyldan astam ýaqyt eńbek etken qyzmetker Temırıan Shańǵaraev júz jasqa toldy. Uly Otan soǵysy men temir jol ardagerin óńirdegi temir jol bólimshesiniń basshylyǵy ujym atynan quttyqtap, ystyq lebizderin bildirdi.
«Jambyl jol bólimshesinde Uly Jeńisti jaqyndatýǵa atsalysqan ardagerlerdiń sany 14 adamdy quraıdy. Surapyl soǵysta ot keshken kózi tiri jaýyngerlerdiń biri – qart temirjolshy Temırıan Shańǵaraev ǵasyrlyq mereıtoıyn atamaq. Kún sanap qatary sıregen osyndaı qazynalarymyzdy qurmetteý – urpaqqa paryz», deıdi qart sarbazdy quttyqtaı barǵan «Qurmetti temirjolshy», Jambyl jol bólimshesi ardagerler keńesiniń tóraǵasy Saǵymbek Aqshalov.
Júz jasqa tolǵan aqsaqal aıaǵyn nyq basyp, qonaqtaryn qoshemetpen qarsy aldy. 1917 jyly Bashqurtstanda týyp, 19 jasynda ásker qataryna alynǵan sarbaz Jeńis týyn kóterýge úles qosqanyn maqtan etedi. Soǵystan soń elge aman-esen oralyp, Jambyl vagon paıdalaný deposynda zeınetke shyqqanǵa deıin tabandy eńbek etedi.
«Ákemiz toǵyz perzent súıip, barlyǵymyzdy aıaqtandyrý úshin aıanbaı ter tókti. О́zi óte eńbekqor, tipti densaýlyǵy syr berse de dári-dármekke júginbeıdi. Osy jasyna deıin aq halattylardyń kómegine zárý bolǵan emes. Alaıda qazirgi kezde júrip-turýy qıyndaǵan soń meniń ulym jaǵdaıyn jasap otyr», dedi qyzy Danııa.
Ashat RAIQUL, «Egemen Qazaqstan»