Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda Talas aýdany, Aqkól aýylynda ornalasqan №14 Talas kollledjiniń janynan rýhanı damytý ortalyǵy ashyldy. Kópten kútken qýanyshty bólisýge arnaıy qurmetti qonaqtar shaqyrylyp, aýyl turǵyndary da ıgilikti istiń kýágeri boldy.
Saltanatty sharada Aqkól aýyly ardagerler keńesiniń tóraǵasy Turǵynbaı Tájibekov, № 14 Talas kolledjiniń ardager ustazy Qanjan Ábdıev, aýdandyq ishki saıasat bóliminiń bas mamany Baqtııar Tómeshbaı, №14 Talas kolledjiniń dırektory Aıman Tileýkeeva jáne Aqkól aýyldyq okrýginiń ákimi Asqar Qýanysh rýhanı ortalyq jaıly jyly lebizderin bildirip, atalǵan ortalyqtyń ulttyq qundylyqtarymyz ben elimizdiń tarıhı muralaryn jastarǵa nasıhattap, osy baǵytta stýdentter men aýyl turǵyndaryna qajetti aqparat beretinin jetkizdi. Sonymen qatar aýyl turǵyndary da Elbasy maqalasynan týyndaıtyn mindetter týraly óz oılaryn ortaǵa salyp, pikir bildirdi. «Jalpy, qoǵamnyń qaı salasyn bolsyn batystyq ólshemdermen qarap, ozyǵynan tozyǵy kóp sheteldik qundylyqtarǵa yryq bergendeı edik. Osy jaıtty Elbasy óziniń «Bolashaqqa baǵdar: rýhanı jańǵyrý» maqalasynda óte áserli jetkizdi. «HH ǵasyrdaǵy batystyq jańǵyrý úlgisiniń búgingi zamannyń bolmysyna saı kelmeýiniń syry nede? Menińshe, basty kemshiligi – olardyń ózderine ǵana tán qalyby men tájirıbesin basqa halyqtar men órkenıetterdiń erekshelikterin eskermeı, bárine jappaı eriksiz tańýynda. Ájeptáýir jańǵyrǵan qoǵamnyń óziniń tamyry tarıhynyń tereńinen bastaý alatyn rýhanı kody bolady. Jańa turpatty jańǵyrýdyń eń basty sharty – sol ulttyq kodyńdy saqtaı bilý» dep atap ótti Memleket basshysy. Bizdińshe, Elbasy aıtqan sol ulttyq kodtyń bir kilti – bilim men ǵylymda jatqandaı. Sondyqtan búginde jańa ashylǵan rýhanı damytý ortalyǵynda Elbasy maqalasynda aıtylǵan bilim men ǵylym nasıhattalatyn bolady», dedi óz sózinde Aıman Tileýkeeva.
Aldaǵy ýaqytta jańa ashylǵan rýhanı damytý ortalyǵynda Memleket basshysynyń baǵdarlamalyq maqalasyn negizge alyp túrli sharalar, keshter, tárbıelik máni joǵary jıyndar uıymdastyrylatyn bolady.
Hamıt ESAMAN, «Egemen Qazaqstan».
Jambyl oblysy