Taıaýda AQSh bıligi Soltústik Koreıany terrorızmdi qoldaıtyn memleketter tizimine engizgen bolatyn. О́z kezeginde Phenıan Aq úıdiń bul áreketin arandatýshylyqqa balap, eldegi ıadrolyq qarý baǵdarlamasyn odan ári kúsheıtetinin jetkizgen.
Korean Central News agenttigine bergen suhbatynda Soltústik Koreıa syrtqy ister mınıstrliginiń ókili «Bizdiń uly elimizdi «terrorızm» tizimine engizýge dáti barǵan ońbaǵan buzaqylarǵa áskerimiz ben halqymyzdyń ashýy órship tur», dep málimdedi. Al Jazeera arnasynyń habarlaýynsha, keıbir sarapshylar Aq úı bıliginiń áreketi Soltústik Koreıanyń shymbaıyna batyp, ıadrolyq qarýdy ıgerýge qulshynysyn odan ári kúsheıtip jiberetininen qaýiptenedi.
«Syrtqy ister mınıstriniń ókili terrorızmdi qoldap otyrǵan memleket dep aıyptaý amerıkalyq avtorıtarlyq júıeniń quraly ekenin jáne olardyń óz kózqarasyna saı kelmeıtinderdi syryp tastaýǵa talpyný ekenin aıtty. Buǵan deıin AQSh prezıdenti Donald Tramp Soltústik Koreıany ıadrolyq qarý arqyly álemge qaýip tóndirýden bólek, halyqaralyq terrorızmdi qoldap otyrǵanyn málimdegen», deıdi Al Jazeera arnasy.
Jalpy, AQSh pen Soltústik Koreıanyń arazdyǵy búgin bastalǵan joq. Buǵan deıin KHDR birneshe márte ıadrolyq qarýyn synaqtan ótkizip, qurlyqaralyq ballıstıkalyq zymyrandaryn ushyrǵan-dy. Aq úı basshysy D.Tramp Soltústik Koreıanyń bul áreketin aıyptap, qarýly qarsylyq kórsetýge ázir ekenin jetkizdi. О́z kezeginde Kım Chen Yn da kez kelgen ýaqytta Amerıkanyń kúlin kókke ushyrýǵa daıyn ekenin málimdedi. Eki basshynyń sóz qaqtyǵysy biraz jerge baryp basylǵan-dy.
Soltústik Koreıa syrtqa júnin qampaıtyp kórsetýge talpynǵanymen, eldegi jaǵdaı máz emes. Taıaýda KHDR áskerinen qashqan sarbazdyń vıdeosy jer jahandy sharlap ketken bolatyn. О́z elinen bas saýǵalaǵan soltústikkoreıalyq azamat Ońtústik Koreıamen aradaǵy shekaraǵa ólermendikpen umtylǵan-dy. KHDR shekarashylary zań buzýshyny qýalap, birneshe jerden jaralady. Alaıda oq tıgenine qaramastan, ol kórshi eldiń aımaǵyna ótip úlgergen. Mundaı oqıǵa kýá bolǵan Ońtústik Koreıanyń shekarashylary beıbaqqa kómek qolyn sozypty. Sarbazdyń densaýlyǵyn baqylaǵan dárigerler onyń denesinen 27 santımetrlik ishek qurtyn taýyp aldy. Qazir qashqynnyń jaǵdaıy táýir. BBC arnasynyń habarlaýynsha, eresek adamnyń denesinde uzyn ishek qurttyń bolýy eldegi jaǵdaıdyń nasharlyǵyn kórsetedi.
Sholýdy ázirlegen Abaı ASANKELDIULY, «Egemen Qazaqstan»