Ońtústik Qazaqstan oblysyndaǵy aýdan, qalalardyń damýy búkil oblys boıynsha bir konsepsııa arqyly damý kerek. Jalpy Ońtústik Qazaqstan oblysy - respýblıkadaǵy orta ǵasyrlyq qalalardyń bolýy jaǵynan, kólemi jaǵynan, jalǵyz aımaq bolyp tabylady. Bul týraly oblys ákimi Janseıit Túımebaev Ońtústik Qazaqstan oblysy qala qurylysy keńesiniń otyrysynda aıtty, dep habarlaıdy egeme.kz OQO ákimdiginiń baspasóz qyzmetine silteme jasap.
Aldaǵy jyldary Ońtústik Qazaqstan oblysynyń tarıhy qaıta jańǵyrmaq. «Rýxanı jańǵyrý» baǵytyna sáıkes týrızmdi damytý jáne tarıxty tanytý maqsatynda óńirde, ótken ǵasyrlardy sıpattaıtyn oryndardy qaıta jańǵyrtý jumystary júrgiziledi. Memleket basshysynyń rýhanı jańǵyrý maqalasynan keıin, ózimizdiń tarıhymyzǵa qurmetpen qaraıtyn kez kelgenin aıtqan aımaq basshysy búgingi basqosýdyń maqsaty da osy ekenin jetkizdi.
«Ońtústik Qazaqstan oblysy - Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy boıynsha jáne arhıtektýralyq sheshim men jalpy týrızmderdi kóbeıtý, tartý konsepsııasy boıynsha Ońtústiktiń óziniń bet-beınesi bolýy qajet. Ol qalaı bolý kerek? Ár jerde ár túrli bolmaýy kerek. Iаǵnı, Ońtústik óńirine kelgende sol orta ǵasyrlyq qazaq dalasynyń, qazaq arhıtektýrasynyń, qazaq úıleriniń jáne turmysy men ómiriniń ıisi shyǵyp turýy tıis. Bul jaǵynan bizde eskertkishter jetkilikti. Endi, bárimiz birlese sol dúnıelerdiń tarıhı qalpyn buzbaı retke keltirý jumystaryna jumyla kirisýimiz kerek», - dedi oblys ákimi J.Túımebaev.
Qazaqstan Respýblıkasy Sáýletshiler Odaǵynyń músheleri men qoǵamdyq pikir keńesshileri jáne belgili sáýletshilerdiń basy qosylǵan keńes músheleriniń jıynynda «Eski qalashyq» mádenı ortalyǵyndaǵy «Arbat» jobasy, «Ordabasy» memorıaldyq tarıhı-mádenı keshenin abattandyrý men Úsh bıdiń eskertkishi, «Flagshtok» jobasy, «Qazyǵurt - Keme qalǵan» tarıhı - mádenı kesheniniń jobasy syndy 8 arhıtektýralyq joba qaraldy.
Májiliste keńes músheleri sáýletshilerdiń usynǵan Ordabasy taýynda ornatylatyn Úsh bıdiń eskertkishiniń maketin, týrıster kelip tamashalaıtyndaı abattandyrý jumystary boıynsha jobasyn jáne Shymkenttegi eski qala ornynyń aýmaǵynda arheologııalyq park-mýzeıi, ashyq aspan astyndaǵy mýzeı qurý jobasyn, sonymen birge Qazyǵurt taýyn tarıhı-mádenı ortalyqqa aınaldyrý baǵytyndaǵy jobalary men maketin qyzý talqylap, óz usynystaryn bildirdi.
Sonymen qosa, sáýletshiler Shymkent qalasy – 2020 jyly táýelsiz memleketter dostastyǵynyń mádenı ortalyǵy degen ataqqa ıe bolǵanyn, sol jyly qalanyń 2000 jyldyq tarıhy atalyp ótiletin bolady. Sonymen qatar, Shymkent «Jibek joly» nomınasııasy boıynsha álemdik mádenı mura tizimine de usynylyp otyrǵanyn aıtyp, eski qalanyń qundylyqtaryn saqtaı otyryp, tarıhymyzdy kórsete bilýimiz kerek dep óz sózderin túıindedi.
Aıta keteıik, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda «Qasıetti Qazaqstan» respýblıkalyq ortalyǵyna oblystan 104 nysan usynyldy. Qazirgi tańda respýblıka boıynsha 100 nysan iriktelip alynsa, onyń ishine Ońtústik Qazaqstan oblysynan 23 nysan enip otyr. Qalǵan 81 tarıhı-mádenı eskertkish jergilikti mańyzy bar qasıetti, kıeli jerlerdiń tizimine engizilgen.