Aqtaý portynda «Qazaqteńizkólikfloty» kompanııasynyń uıymdastyrýymen «Embi» jáne «Talas» súıretkish kemelerin saltanatty qabyldaý rásimi ótti, dep habarlady Mańǵystaý oblysy ákiminiń baspasóz qyzmeti egemen.kz tilshisine.
Joba «Qazaqteńizkólikfloty» úshin úsh súıretkishtiń tolyq jabdyqtalýyn qamtamasyz etý maqsatynda «Damen» keme jasaý kompanııasy jáne «Al Hilal» Islam banki men Otandyq teńiz floty arasynda qarjylyq kelisimniń shartyna sáıkes júzege asyrylýda. Úshinshi súıretkish kemesin jabdyqtaý jumystary kelesi jyly aıaqtalady dep kútilýde. «Qazaqteńizkólikfloty» ulttyq teńiz keme qatynasy kompanııasy sý jańa qýatty zamanaýı býksır esebinen otandyq flot birlikterin ulǵaıtty.
– Elbasy Nursultan Nazarbaev Kaspıı aımaǵy elimizdiń ekonomıkalyq óniminiń eń mańyzdy bóligi ekenin aıtyp keledi. Sonyń ishinde munaı óndirý salasynda qyzmet jasap jatqan kompanııalardyń róli zor. «Teńizshevroıl» kompanııasynyń bolashaqta munaı óndirý múmkindigi odan ári keńeıtiledi. Soǵan oraı úlken jobany júzege asyrý – basty maqsatymyz. Búgingi is-shara sonyń úlken bastamasy dep aıtýǵa bolady. Maýsym aıynda bastalǵan joba qysqa merzimde aıaqtaldy. Gollandııanyń eń iri úlken kompanııasynda jasalǵan býksırler Mańǵystaýdyń ǵana emes, jalpy el ekonomıkasyna paıdasyn tıgizetini sózsiz. Aldaǵy ýaqytta atqarylatyn jobalardyń aqsha aınalymyna ǵana emes, elimizdiń, sonyń ishinde oblystyń turǵyndaryn jumyspen qamtýǵa, otbasyn asyraýyna múmkindik týǵyzady, - dep saltanatty sharada sóz alǵan Mańǵystaý oblysynyń ákimi Eraly Toǵjanov.
Uzyndyǵy 27 metr jáne eni 9 metr býksırler Soltústik Kaspııdiń sýy taıyz aımaqtarynda júzedi. Býkserlerdiń negizgi mindeti kemelerdi súıreý, assıstenttik qyzmetterdi usyný, navıgasııalyq kómek kórsetý jáne zákirlerdi óńdeý. Uıymdastyrýshylardyń aıtýynsha, «Qazaqteńizkólikfloty» sý jańa kemelerdi tolyqtyrý arqyly damý strategııasyn birizdilikpen jáne kezeń-kezeńmen iske asyrady. Bul Kaspıı teńiziniń qazaqstandyq sektoryn ıgerý boıynsha jobalar sheńberinde kompanııa usynatyn qyzmetter aıasyn keńeıte túspek.
Jańa súıretkishter tereńdigi shektelgen aımaqtarda jumystardy júıeli júrgizý úshin joǵary talapqa saı jabdyqtalǵan. Sondyqtan Aqtaý teńiz porty aımaǵyndaǵy kólik-logıstıkalyq ınfraqurylymdy damytý úshin atalǵan kemelerdiń mańyzy zor.
Gúlaıym ShYNTEMIRQYZY,
«Egemen Qazaqstan».
Sýretke túsirgen Serik MAIEMEROV.
Mańǵystaý oblysy