Astanada «Jańa jahandyq bolmystaǵy Qazaqstannyń jańǵyrý modeli» taqyrybynda ótip jatqan xalyqaralyq konferensııaǵa qatysqan QR Aqparat jáne kommýnıkasııalar mınıstri Dáýren Abaev «100 jańa esim» jobasynyń birinshi kezeńi aıaqtalǵanyn málimdep, jańa jobaǵa kirgenderdiń Prezıdent Nursultan Nazarbaevpen kezdesetinin aıtty.
El úshin aıanbaı eńbek etip jatqan eleýli esimderdiń qataryna jańadan qosylyp jatqan árbir tulǵanyń erekshe jandar ekenin jetkizgen mınıstr olardyń jańa kózqarasty, jańasha oılaýdy qalyptastyratynyna senimdi ekenin aıtty.
«100 jańa esimniń» birinshi kezeńi aıaqtaldy. Biz 102 adamdy iriktep aldyq. Olardyń ómirlik joly men kúndelikti qyzmeti bolashaq urpaqqa úlgi bola alady. Jyldyń aıaǵyna deıin «100 jańa esimge» kiretinderdiń Elbasy Nursultan Nazarbaevpen kezdesýin uıymdastyrýdy josparlap otyrmyz», dedi mınıstr D.Abaev.
Aıta keteıik, elordada QR Tuńǵysh Prezıdenti kúnine arnalǵan «Jańa jahandyq bolmystaǵy Qazaqstannyń jańǵyrý modeli» taqyrybynda xalyqaralyq parlamenttik konferensııa ótip jatyr. Májiliske Reseı, Ázerbaıjan, Túrkııa, О́zbekstan, Armenııa, Italııa, Ispanııa, Qytaı, Birikken Arab Ámirlikteri, Bolgarııa, Majarstan jáne taǵy basqa uzyn sany on bes eldiń delegattary qatysýda. Budan bólek, AQSh-tyń sarapshylary da keldi.