Elimizdiń eńbek jáne áleýmettik qorǵaý salasynyń kóptegen qyzmeti elektrondy formatqa kóshiriledi.
Qaǵaz júzindegi qujattardy qysqartyp, sybaılas jemqorlyqty azaıtý maqsatynda qolǵa alynǵan sıfrlandyrý baǵytyndaǵy jumystar qazirden bastap qoldanysqa engizile bastaıdy. Bul týraly keshe Úkimet úıinde ótken baspasóz máslıhatynda Eńbek jáne halyqty áleýmettik qorǵaý vıse-mınıstri Svetlana Jaqypova málimdedi.
Eńbek jáne áleýmettik saladaǵy basty jańalyq – biryńǵaı elektrondy eńbek bırjasynyń iske qosylýy. Bul júıe respýblıkadaǵy barlyq 199 jumyspen qamtý ortalyǵyn biriktirgeli otyr. Sonyń nátıjesinde 10-ǵa jýyq ınternet-alań ashylyp, jekemenshik jumyspen qamtý agenttikteriniń sany eki esege óspek. S.Jaqypovanyń aıtýynsha, biryńǵaı elektrondy eńbek bırjasy arqyly bir jarym aıdyń ishinde 15 myń adam mamandyqtary men tájirıbesine saı jumys tapqan. Qazirgi kúni elektrondy bırjada 8 myńnan astam túıindeme men 30 myńǵa jýyq bos jumys orny týraly aqparat ornalastyrylǵan.
– Áýeli Astana, Almaty, Pavlodar jáne Shymkent qalalarynda qanatqaqty joba retinde iske qosylatyn biryńǵaı elektrondy eńbek bırjasynda jumysker men jumys berýshi arasyndaǵy eńbek kelisimsharty elektrondy túrde jasalatyn bolady. Ol úshin elektrondy qoltańba qoldanylyp, atalǵan eńbek sharty júıe arhıvinde saqtalyp qalady. Árıne, bul qazirgi qaǵaz júzindegi eńbek kitapshasyn qoldanystan alyp tastaý degen sóz emes, – deıdi vıse-mınıstr. «Jańadan qurylǵan eńbek bırjasynda jasalǵan kelisimsharttar ǵana elektrondy nusqada bolady. 2025 jylǵa deıin elektrondy eńbek bırjasynyń qyzmetterin túrlendire túsetin bolamyz. Biraq qazirgi qoldanystaǵy eńbek kitapshalary sol kúıinde qalady. Erteń zeınetke shyqqanda da azamattyń eńbek ótilin rastaıtyn negizgi qujat osy qaǵaz júzindegi eńbek kitapshasy bolady», dedi ol.
S.Jaqypova, sondaı-aq sıfrlandyrý aıasynda múgedektikti dáleldeý jáne ony anyqtaý jumystary da ońtaılana túskenin jetkizdi. Budan keıin 2018 jyldyń 1 qańtarynan bastap qoldanysqa engiziletin ataýly áleýmettik kómektiń jańa formatyna toqtalǵan vıse-mınıstr bul kómektiń eki túrimen jumyspen qamtý ortalyqtarynyń mamandary aınalysatynyn atap ótti. Mundaǵy keńesshiler men olarǵa taǵaıyndalǵan assıstentter joba qatysýshylarynyń áleýmettik kelisimshart boıynsha mindettemelerin oryndaý baǵytyn qadaǵalap, olarǵa qoldaý kórsetedi.
Ekinshisi, jumyspen qamtý ortalyǵy «bir tereze» qaǵıdatymen jumys isteıdi, ıaǵnı az qamtylǵan otbasylar jergilikti bılik organdaryna, basqa da mekemelerge baryp júrmeıdi, birden jumyspen qamtý ortalyǵyna barady da bir qujattar paketin usyný arqyly máselesin sheshe alady.
Jalpy, Eńbek jáne halyqty áleýmettik qorǵaý mınıstrliginde qurylǵan biryńǵaı aqparat júıede qazirdiń ózinde 14,5 mln adamnyń derekqor bazasy engizilip, ártúrli baǵyttar boıynsha ondaǵan júıeni qamtıdy.
Qymbat TOQTAMURAT, «Egemen Qazaqstan»