Elimizdiń Mádenıet jáne sport mınıstrligi Eýropanyń barlyq qalalaryna úlken týr uıymdastyrmaq.
Sonyń aıasynda bes mýzykalyq spektakl kórsetiledi. Bul týraly Ortalyq kommýnıkasııalar qyzmetinde ótken baspasóz máslıhaty barysynda Mádenıet jáne sport vıse-mınıstri Aqtoty Raıymqulova, «Astana Musical» mýzykalyq teatrynyń kórkemdik jetekshisi, «Qazaqkonsert» memlekettik mekemesiniń bas dırektory, Qazaqstannyń eńbek sińirgen qaıratkeri Ashat Maemırov, Memlekettik akademııalyq nemis drama teatrynyń dırektory Natalıa Dýbs tolyǵyraq málimdedi.
Mádenıet jáne sport mınıstrliginiń qoldaýymen «Astana Musical» teatrynyń, Memlekettik akademııalyq nemis drama teatrynyń ártisteri jáne «Qazaqkonsert» memlekettik mekemesiniń ujymy 2017 jyldyń jeltoqsanynda Eýropa boıynsha úlken týr ótkizedi. Bul týrdyń baǵyty Berlın (Germanııa) – Parıj (Fransııa) – Vena (Aýstrııa) – Brıýssel (Belgııa) – Máskeý (Reseı) sııaqty iri mádenı astanalardy qamtıdy.
«Bizdiń ártisterimizdiń qoıylymdary ónerimizdiń básekege qabilettiligin jáne álemdik mádenıet salasyndaǵy bizdiń ashyqtyǵymyzdy aıqyn kórsetedi. Eýropanyń bes astanasynda «Uly dala teatry» ekskýrsııasy sheńberinde «Astana Musical» mýzykalyq teatry men Respýblıkalyq nemis akademııalyq teatry qazaqstandyq ónerdi zamanaýı úlgide tanystyrýǵa jáne álemdik teatrlyq úderisterge tótep berýge múmkindik beredi», dep atap ótti Mádenıet jáne sport vıse-mınıstri Aqtoty Raıymqulova.
Nemis teatrynyń trýppasy eýropalyq aýdıtorııaǵa Muhtar Áýezovtiń «Qaragóz» dramasynyń jańa, ınnovasııalyq nusqasyn usynady.
«Biz úshin Eýropadaǵy qoıylym óte mańyzdy. Al, atalmysh týyndyǵa bar mahabbatymyzdy, qııalymyz ben talantymyzdy jumsadyq, sondyqtan bul óte erekshe jáne bir mezgilde óte bedeldi bolady dep kútemiz», dedi Memlekettik akademııalyq nemis drama teatrynyń dırektory Natalıa Dýbs.
«Astana Musical» teatrynyń kórkemdik jetekshisi Ashat Maemırov Eýropa týry 3 jeltoqsanda Berlınde bastalyp, 14 jeltoqsan kúni Reseıde aıaqtalatynyn jetkizdi.
Raýan QAIDAR, «Egemen Qazaqstan»