Toqsan bir jasyńyzda sport zalyna baryp, 50 kılolyq shtangany kótere alar ma edińiz? «Áı, qaıdam! Shtangany kótermek túgili, óz basyńdy alyp júrseń soǵan da táýbe», dep otyrǵan bolarsyzdar ishterińizden.
Quı senińizder, quı senbeńizder, О́skemende 91 jasqa kelse de sport zalynan shyqpaıtyn, shtanga ǵana emes, gir tasyn da kóteretin Nıkolaı Nemchınov degen qarııa turady. Túrine qarasańyz toqsanǵa keldi dep aıtpaısyz, tyń, sergek kórinedi. Jaqynda oblystaǵy eń jasy úlken sportshymen júzdesip, sport zalyna birge baryp, jattyǵýyn kórdik. Aqsaqal áýeli 30 kılolyq shtangany kóterdi, sosyn 40, osymen toqtaıtyn shyǵar degenbiz. Joq, 50 kılony da eńserip, bir márte kóterdi. Tańǵaldyq. Tańǵala turyp, sport zalyna barmaıtynymyz úshin yńǵaısyzdanǵanymyz da ras.
«Ár kún saıyn tańerteń 45 mınýt boıy jattyǵý jasaımyn. Gir kóteremin. 10 kelilik gantelim bar. Kóbine jaıaý júremin. Mine, qudaıdyń qoldaýymen qazir 91-ge kelip otyrmyn. Osy jasqa kelgende kózimniń bir jetkeni, fızıkalyq jattyǵý, toqtaýsyz qozǵalys adamnyń organızmin nyǵaıtyp, ómirin uzartady eken. Eń bastysy, bulshyq etterdiń demalýyna múmkindik bermeý kerek», deıdi kóp jasaǵan qarııa.
«Tisterińizdiń kópshiligi saý eken. Jeńil qımyldaısyz. Osynsha jasqa jetýdiń syry nede?» dep suradyq. «Munyń eshqandaı da qupııasy joq. Kezinde menimen birge sport zalyna baryp júrip, meıramhanaǵa da ýaqyt tabatyn jigitterdiń bári búginde aramyzda joq. Eń áýeli adam ózine qurmetpen qaraýy kerek. Ár adamnyń ishki tártibi bolýy qajet. Baǵalaı bilsek, adam boıyndaǵy qýat degenińiz ǵajap dúnıe. Biz ony qalaı bolsa solaı jumsaımyz da keıin opyq jeımiz. Sondyqtan ár adam boıyndaǵy kúsh-qýatyn óz ornymen jumsaýdy úırený kerek», deıdi N.Nemchınov.
Reseıdiń Altaı aımaǵynda dúnıege kelgen keıipkerimiz shtanga kóterýmen Baltyq jaǵalaýynda áskerı boryshyn ótep júrgen kezden beri kásibı túrde shuǵyldanyp, óz salmaǵynda birneshe dúrkin chempıon atanypty. Latvııa KSR-iniń 3 dúrkin jeńimpazy bolyp, KSRO halyqtary spartakıadasynda bes jyl qatarynan des bermepti. Keńes zamanynda aýyr atletıkadan el chempıonatynda bes márte top jarypty. 1957 jyly KSRO chempıonatynda 3-oryn alyp, álemniń úzdik 10 atletiniń sapyna enipti. Bir qyzyǵy, qarııa gir kóterýmen 68 jasynan bastap shuǵyldanyp, sol jyly birinshi razrıad ıelenipti. 70 jasynda 24 kelilik gir tasyn 15 ret kóterip, 80 jasynda 142 kelini baǵyndyryp, rekord ornatypty.
Toqsan bir jasqa kelgen sportshy buǵan deıin bir top qarııalarmen birge qaladaǵy B.Aleksandrov atyndaǵy sport saraıynda jattyǵyp júripti. Alaıda sportsúıer zeınetkerler sońǵy úsh-tórt aıdan beri jattyǵatyn oryn tappaı, ár jerdi bir saǵalap júrgen jaıy bar. Sport saraıyna kelgen jańa basshy 23 qarııaǵa jattyǵý zalyn qımaǵan sekildi. Degenmen de Nıkolaı Nemchınov bul máseleni sheshýge oblystyq sport ardagerleri keńesiniń tóraǵasy Muqan Aǵzamov járdemdesip jatqanyn, О́skemendegi Dene shynyqtyrý-saýyqtyrý ortalyǵynan zal beriletinin aıtty.
Aıtpaqshy, oblys ortalyǵyndaǵy emhanalardyń birinde jumys isteıtin, esimi oblysqa belgili bilikti dáriger Raıa Rahımova salamatty ómir saltyn ustanǵan aqsaqaldyń sýretin kireberiske ilgizip qoıypty desedi. Mundaı adamdardyń sýretin qaladaǵy ár mekemege ildirip qoısa da artyqtyq etpeıdi-aý.
Azamat QASYM, «Egemen Qazaqstan»
О́SKEMEN