Elbasy kitaphanasynda Qazaqstan Respýblıkasynyń Tuńǵysh Prezıdenti kúnine jáne elordany Astanaǵa kóshirýdiń 20 jyldyǵyna oraı «Biregeılik pen birlik: Qazaqstan joly jáne N.Nazarbaevtyń úlgisi» halyqaralyq ǵylymı-tájirıbelik konferensııasy ótti.
Jıynǵa Din isteri jáne azamattyq qoǵam mınıstri Nurlan Ermekbaev, «Rýhanı kelisim kongresi» halyqaralyq qoǵamdyq qorynyń prezıdenti Tólegen Muhamedjanov qatysty.
Konferensııanyń plenarlyq sessııasynda Qazaqstan Respýblıkasy Tuńǵysh Prezıdenti – Elbasy kitaphanasy dırektorynyń orynbasary Ámirhan Rahymjanov jıynǵa qatysýshylarǵa Memlekettik hatshy Gúlshara Ábdiqalyqovanyń quttyqtaý hatyn oqyp berdi.
«Ulttyq biregeılikti saqtaý jáne nyǵaıtý – kóp qyrly ári jaýapty mindet. Ony laıyqty deńgeıde iske asyrý jahandyq ózgerister zamanyndaǵy turaqty damýdyń kepili bolyp tabylady. Táýelsizdik jyldary Qazaqstan ulttyq biregeılik pen qoǵam birligin arttyrýdyń ózindik modelin qalyptastyrdy. Bul – Elbasy Nursultan Nazarbaevtyń esimimen tikeleı baılanysty», delingen Memlekettik hatshynyń hatynda.
Sonymen qatar, Din isteri jáne azamattyq qoǵam mınıstri N. Ermekbaev konferensııaǵa jınalǵandarǵa arnap baıandama oqydy. Onyń aıtýynsha, Elbasynyń tarıhı sheshimderi Qazaqstanda konfessııaaralyq jáne qoǵamdyq kelisimdi nasıhattaıtyn zaıyrly memleket qurýǵa múmkindik berdi. Sonymen qatar, Vedomstvo basshysy Qazaqstanda Islam dinin qabyldaýdyń ózindik modeli qalyptasqanyn atap ótti.
«Qazaqstandaǵy turaqtylyq pen kelisimniń qupııasy nede? Onyń jaýaby – anyq. Táýelsizdiktiń alǵashqy kúnderinen bastap, Elbasynyń barlyq bastamalary qazaqstandyqtardyń birligin nyǵaıtýǵa baǵyttaldy. Prezıdent atap kórsetkendeı, Qazaqstannyń tarıhy birlikti nasıhattaıdy», dedi N.Ermekbaev.
Konferensııaǵa gýmanıtarlyq baǵyttaǵy salalarda eńbek etip júrgen elimizdiń qoǵam qaıratkerleri men ǵalymdary, Germanııa, Úndistan, Iran, Qyrǵyzstan, О́zbekstan elderinen kelgen sarapshylar qatysty. Jıynnyń maqsaty álem elderindegi biregeıliktiń qalyptasý máselelerin qazaqstandyq tájirıbemen salystyra otyryp, etnosaralyq jáne konfessııaaralyq kelisimniń qazaqstandyq úlgisiniń artyqshylyqtaryn talqylaý. Irgeli shara barysynda Qazaqstannyń úshinshi jańǵyrýynyń mindetteri, rýhanı jańǵyrý men qoǵamdyq sana, biregeılik máseleleri jan-jaqty sóz boldy.
Abaı ASANKELDIULY, «Egemen Qazaqstan»