Búgin Qazaqstan Prezıdenti Nursultan Nazarbaev resmı saparmen Belarýs Respýblıkasynyń astanasy Mınsk qalasyna bardy.
Prezıdenttiń eki kúnge josparlanǵan sapary aıasynda Nursultan Nazarbaev Ujymdyq qaýipsizdik shart uıymy Ujymdyq qaýipsizdik keńesiniń mereıtoılyq sessııasyna, Qazaqstan-Belarýs bıznes forýmyna jáne basqa da is-sharalarǵa qatysady dep josparlanǵan.
Bir aıta keterligi, Qazaqstan men Belarýs arasynda ártúrli salalar boıynsha 70-den astam kelisimsharttar jasalǵan. Al eki memleket arasyndaǵy dıplomatııalyq qarym-qatynastyń ornaǵanyna bıyl 25 jyl boldy. Qazaqstan TMD elderi ishinde Belarýs Respýblıkasynyń negizgi saýda seriktesteriniń biri sanalady. Elimizdiń Ulttyq ekonomıka mınıstrligi Statıstıka komıtetiniń málimetteri boıynsha, byltyr eki el arasyndaǵy saýda aınalymy 364,5 mln dollardy quraǵan. Al 2017 jyldyń qańtar-tamyz aralyǵynda bul kórsetkish 375,6 mln dollarǵa jetti.
Elbasy Nursultan Nazarbaev buǵan deıin Belarýs eline 2012 jyldyń mamyr aıynda resmı saparmen barǵan edi. Al Aleksandr Lýkashenko Qazaqstanǵa resmı saparmen 2013 jyly keldi.
Esterińizge sala ketsek, Nursultan Nazarbaev Belarýs Respýblıkasynyń Prezıdenti Aleksandr Lýkashenkomen osy jyldyń 8 maýsymynda Shanhaı yntymaqtastyq uıymyna múshe memleketter basshylarynyń keńesi aıasynda kezdesip, ekijaqty seriktestiktiń mańyzdy máselelerin talqylaǵan bolatyn.
Gúlnur Qýanyshbekqyzy,
"Egemen Qazaqstan"
Mınsk