Elordada jeltoqsandaǵy merekege oraı qalany bezendirý tártibi bekitildi. Soǵan sáıkes Jańa jylǵa daıyndyq Táýelsizdik kúnin merekelegennen keıin bastalady. Bul týraly Astana ákimi Áset Isekeshev qalalyq ákimdikte ótken apparat jınalysynda málimdedi, dep habarlaıdy elorda ákimdiginiń medıa ortalyǵy.
Memlekettik jáne Ulttyq merekeler – Qazaqstan Respýblıkasynyń Tuńǵysh Prezıdenti kúnin, Qazaqstan Respýblıkasynyń Táýelsizdik kúnin jáne Jańa jyldy elordanyń aýmaǵynda merekeleý aıasynda qalany bezendirý týraly Astana ákimi Áset Isekeshevtiń tapsyrmasyn oryndaý maqsatynda jumysy júrgizilýde.
Al elimizdiń basty merekesi - Táýelsizdik kúnine arnalǵan bezendirý jumystary 12 jeltoqsanda bastalady. Ataýly mereke kezinde Astanany 1280 jalaý, 2 jalaýsha pannosy, 64 saıabaq elementi jáne jaryq aspanyń 1 jıyntyǵy sándeıdi dep josparlanyp otyr. Sondaı-aq, Otan qorǵaýshylar monýmentindegi sý burqaqtardyń ornyna jaryq dıodty ınstalıasııalar ornatylady. Jaryq fontany metall karkasynyń negizinde jasalady. Konstrýksııanyń bıiktigi 3,5 metrdi quraıdy. Jaryqtandyrý aq jáne kók túste bolady.
Jańa jylǵa daıyndyq Táýelsizdik kúnin merekelegennen soń ǵana, ıaǵnı 18 jeltoqsanda bastalady. Ol maqsatta shaharda 25 jańa jyldyq shyrsha, 12 hokkeı alańy, 15 muz aıdyny, 10 muz tómpeshigi, 2 muz qalashyǵy («Astana EHPO-2017» Ulttyq kompanıasy» AQ aýmaǵynda jáne Astana qalalyq ákimdigi ǵımaraty aldyndaǵy alańda) boı kóteredi. Buǵan qosa 2 jaryq pannosy, 18 jaryq ıllıýmınasııasy, 52 jaryq ıllıýmınasııalyq arkasy, 830 panel-kronshteın, 106 KSP, 5 kópir men kólik jolaıryǵy ornatylatyn bolady. 3300 shaǵyn jáne orta bıznes nysandarynyń qasbeti, 255 aǵash, 2 qala saıabaǵy men 1 gúlzar bezendiriledi.
Kásipkerlik jáne ónerkásip basqarmasynyń aqparatyna sáıkes, ShOB kásipkerlikteri óz erkimen qalada elýden astam shyrshany ornatatyn bolady. Elordadaǵy «Kerýen», «Rahmet», «Han Shatyr», «Saryarqa» sııaqty oıyn-saýyq ortalyqtary shyrshalardy ornatyp, bezendirý sharalaryn bastap ketken.
Aıta keteıik, sońǵy ýaqytta áleýmettik jelilerde qaladaǵy jekelegen nysandardyń Jańa jylǵa daıyndyǵy men Táýelsizdik kúnin eleýsiz qaldyrǵanyna qatysty birqatar pikirtalas týyndaǵan bolatyn. Osyǵan oraı Astana ákimi óz oıyn bildirdi.
«Jańa jyldyq shyrshalardy Táýelsizdik kúnin atap ótken soń, 18 jeltoqsannan bastap ornatamyz dep josparlaǵan edik. Keıbir jekelegen nysandar shyrsha ornatyp, ony bezendire bastady. Buǵan qatysty narazylyq bildirgender bar. Táýelsizdik kúni elimizdiń basty merekesi bolǵandyqtan, basymdylyq sol merekege beriledi. Shaǵyn jáne orta bıznes nysandary qalanyń merekelik bezendirýin qatań ustanatyn bolsyn. Táýelsizdik kúninde saltanatty jáne merekelik sharalar ótedi. Onyń arasynda karate-kıokýshınkaıdan Kazakhstan Open, ústel tennısinen «Seamaster 2017 ITTF World Tour GrandFinal» týrnıri, «Kúı Qaınary» VI kúı tartys, QR Táýelsizdik kúninen arnalǵan «Táýelsizdigim – teńdigim, Egemendigim – eldigim!» atty jas aqyndar aıtysy, kitap kórmesi men qazaqstandyq estrada ókilderiniń qatysýymen dástúrli konsertter ótedi», - dedi Astana ákimi Áset Isekeshev qalalyq ákimdikte ótken apparat jınalysynda.
Sonymen birge, elorda ákimi aýdan ákimderi men Kásipkerlik jáne ónerkásip basqarmasynyń basshysyna shaǵyn jáne orta bıznes ókilderine qalany merekelik bezendirýge qatysty bekitilgen josparyn ustaný týralý túsindirme jumystaryn júrgizýge tapsyrma júktedi. Iаǵnı, Jańa jylǵa daıyndyq Táýelsizdik kúni atap ótkennen soń ǵana bastalady.