Elbasy jáne egemendik

Uzyna boıy tarıhymyzda nebir qııamet-qıyndyqtardy basymyzdan keshken, san ret qırap, san ret boı túzegen, «tarıhtyń taǵdyrly kóshi» deıtin uzaq jolda saltanatty da ómir súrgen, handary altyn taqta da otyrǵan, altyn saraılarda da turǵan, irgeles eldermen beıbit ómir súre de bilgen elmiz.

Taýqymetti sonshama kóp keshken, taǵdyry aıanyshty, ezilip-janshylǵan, jabyǵyp japa shekken, taryǵyp zaryqqan halyq jer betinde ekeý bolsa, sonyń bireýi – qazaq.

Reseıge bodan bolǵan úsh ǵasyrda tarıhymyz, ar-ojdanymyz tabanǵa taptaldy. Keńpeıil, ańqaý qazaqtyń mal-jany tárkilenip, asharshylyqqa ushyrady. О́zgeniń tarıhyn ózimizge telip oqytty. Handarymyz ben bılerimiz, bekterimiz ben batyrlarymyz – ájýaǵa, kelekege, tarıhymyz – saıasattyń quralyna, Alash arystary óz halqynyń jaýyna aınaldy. Sana, dástúr kúıredi. Halyq jadynan aıyryldy. Ult retinde jer betinen joıylyp kete jazdadyq.

El ylań, dúnıe topalań bolǵan, jylqy ysqyrsa – jeldiki, aıdasa jaýdiki bolyp turǵan, qazaqtyń aýzynan qaqpaq, basynan toqpaq ketpegen, qylysh – qynabynan, qanjar qynynan sýyrylǵan, naıza beldeýden sheshilgen, bes qarýyn asynǵan, at ústinde kún kórgen, aptada belin sheshpegen, pyran kıip, pyraq mingen zaman edi ol.

Dalamyzdy da, ózimizdi de kórmegen batystyń ǵalymdary qazaqty jer betindegi jabaıy kóshpelilerdiń qataryna qosty. Olar órkenıettiń Shyǵystan bastalǵandyǵyn, Eýropa qalyń uıqyda jatqanda bul óńirde saltanatty ómir salty bolǵandyǵyn bile tura moıyndaǵylary kelmedi. О́rkenıettiń tutas bir dáýirin jasaǵan ata-tegimiz – ǵundardy da, onyń kósemi Edil (Attıla) patshany da, kók Táńiri men qara jerdiń ortasyn túgel bılegen, dúnıeniń tórt buryshyn aýzyna qaratqan Qaǵanat qaharmandaryn da jabaıyǵa sanady. Túrk órkenıetin aýyzdaryna da alǵysy kelmedi.

Zyǵyrdanyńdy qaınatatyn, pushaıman qylyp sergeldeńge salatyn, dosyń túgili jaýyńa da tilemeıtin osyndaı qorlyqty, sumdyqty basymyzdan keshken, tarıhqa esesi ketken elmiz.

Osynyń bári esińe túskende, toz-toz bolyp, bytyrap, jer betinen joıylyp ketpeı, Uly Dalanyń tutastyǵyn da saqtap, bul zamanǵa qalaı jetkenbiz dep qaıran bolasyń. Qalaı aıtqanda da, taryqqanda – jol, qamyqqanda aqyl tapqan, eldiktiń týyn jyq­paǵan, qalyń eliniń kóshin bas­taǵan Eltutqalar qaı zamanda da qa­zaqta az bolǵan joq: Móde, Býmyn, Estemı, Elteristeı qaǵan­dar, Kereı, Jánibek, Qasym, Esim, Táýke, Abylaıdaı handar, Tony­kók, Qorqyt, Asanqaıǵy, Qaztýǵan, Shal­kıiz, Úmbeteı, Aqtanberdi, Buqar­daı abyz jyraýlar, Maıqy, Tóle, Qazybek, Áıtekedeı kemeńger bıler, Edil, Kúltegin, Alpamys, Qo­bylandy, Edige, Qarasaı, Qa­banbaı, Bógenbaı, Berdiqoja, Naý­ryzbaıdaı dańqty batyrlar eldi­gimizdi de, keńdigimizdi de saqtap qalǵan asyldar edi.

Ásirese qazaqty ult qyp uıys­tyryp, el qylyp qalyp­tas­tyrǵan Abylaı han men Tóle, Qazybek, Áıteke bılerdiń jóni bólek. Bular – basyna baq qonyp, Qydyr daryǵan, kósilgende – kósem, sheshilgende – sheshen, qalyń eldiń qaıǵysyn jutyp, qamyn jegen, qara qyldy qaq jarǵan, jurtyna tirek, pana bolǵan, aqyly darııa ken bolǵan, qaraǵa da, hanǵa da teń bolǵan, eline sózi em bolǵan, jurtyna sózi jón bol­ǵan, ádildigimen eldi aýzyna qarat­qan dala danyshpandary edi, qazaq halqynyń tórt kemeńgeri, el­digimizdiń tórt qubylasy – tórt tireýi, bılik pen sheshendiktiń jy­ǵylmaıtyn tórt týy edi.

Búginde irgeli el bolyp otyr­ǵanymyz da áýeli sol árýaqtardyń arqasy.

Sol zamanda Abylaı, Tóle, Qa­zybek, Áıtekedeı danalardyń bol­ǵany – qazaqtyń baǵy edi, kóz ja­syn qudaıdyń kórgeni, tileýin ber­geni edi, degeniniń bolǵany, kóńi­liniń tolǵany edi, basyna baqtyń qonǵany edi.

Ne kerek, qazaq ony da baǵalaı almady. Baq baǵalaǵannyń basyn­da ǵana turatynyn bilmedi. Bilgisi de kelmedi. Birin biri tyńdaı ber­meı­tin, biriniń sózin biri uqqysy kele bermeıtin, ózderin shetinen da­nyshpan sanaıtyn qazaq odan da sabaq alǵan joq. Tórt danadan keıin qazaq yryń-jyryń; basynan baǵy, astynan taǵy ushqan, daý-damaıy qozǵan, dáýreni ozǵan asa bir aýyr kezeńdi keshti.

Keńes ımperııasy tusynda ta­rı­hymyz saıasatqa aınaldy, óz arystaryn óz halqyna jaý qyl­dy. Birin birine aıdap saldy. El ishinde óshtestik, alaýyzdyq, jik­shildik órtteı qaýlady. Jurt kimniń dos, kimniń qas ekenin bile almaı sergeldeńge túsip, dal boldy. El irgesi sógildi. Elge tutqa bol­ǵan­daryn ıtjekkenge aıdatty. Sóı­tip, óz jaqsysyn ózi qorlady. Ań­qaý qazaq munyń da artynyń ne­ge aparyp soǵatynyn ańǵarmady.

Keńestik Sosıalıstik Res­pýb­lıkalar Odaǵy deıtuǵyn elde «Qazaqpyn» dep te, «Meniń ana tilim – qazaq tili» dep te aıta alma­dyq, aıtqyzbady. Til de, din de, tarıh ta, mádenıet te, salt-dástúr de, ádet-ǵuryp ta, ata joly da – bári de kúıredi, mansuq boldy. Eldiń eńsesi tústi. Qatygezdik, samarqaýlyq, jal­qaýlyq, nemquraıdylyq, jaǵym­­pazdyq, ekijúzdilik etek aldy. Kóbi ótirik kúldi, jalǵan sóı­ledi. Qazaqtyń aqyly men sanasyn túgel abaqtyǵa japty. Qaısy biri tý­ǵan jer, ósken eldi tastap ketýge májbúr boldy. Qazaq halqynyń kósemderi men ıgi jaqsylary osylaı ádiletsizdiktiń, qatygezdiktiń qurbany boldy.

«Dáýir almasyp jatqanda ómir súrme», deıdi eken qytaılar. Búgingi urpaqtyń ómiri dáýir men dáýir, ǵasyr men ǵasyr almasyp, zaman ózgerip jatqan tusqa týra keldi. Biz osy kúnge aryp-ashyp, jadap-júdep, sharshap-shaldyǵyp, talyqsyp, seńdeı soǵylysyp, tentek qoıdaı teńselip, aqylymyzdan, jadymyzdan, sanamyzdan aıyryla jazdap jettik. Shyrǵalań, azapty joldardan óttik, azattyq jolǵa áreń jettik.

Qudaıǵa shúkir, Alla kóz jasymyzdy kórdi, tilegimizdi berdi, basymyzdan baq taıǵan, qan jylaǵan zar zamanymyz artta qalyp, jańa dáýirdiń, jańa zamannyń esigin ashtyq.

Iá, taǵdyr, zaman solaı boldy. Egemendikke kemeńger úsh bı de, uly Abylaı han da, basyn báıgege tikken bahadúrler de jete almady. Biz jettik.

Sóıtip kóz aldymyzda jer de, el de, adam da, qoǵam da, zaman da demde ózgerdi. El esin jıdy, etegin japty, eńsesin kóterdi. Egemen Qazaqstan memleketi kósh túzedi. Uly kóshti N.Á. Nazarbaev bastady.

N.Nazarbaev el tizginin qolyna almaǵaıyp, aýmaly-tókpeli, qıyn kezeńde aldy. El birligin egemendigimizdiń týy etip kóterdi. Tarıhtyń da, taǵdyrdyń da synynan abyroımen ótip, halqyn da qyl kópirden, janyp turǵan órtten aman alyp shyqty.

N.Nazarbaev – túp atasynan, arǵy teginen batyrlyq, sheshendik úzilmegen tektilerdiń urpaǵy. Babasy – eńsegeı boıly Esimhannyń týyn ustaǵan qolbasshy Qarasaı batyr, atasy – Nazarbaı bı. Ákesi Ábish pen anasy Áljan Sultanyn áýlıege túnep júrip Qudaıdan tilep alǵan.

Bolashaq Prezıdentti men alǵash 1957 jyly kórgen edim. Qaskeleńdegi Abaı atyndaǵy qazaq orta mektebinde pedpraktıkadan ótkenimde Nursultan onynshy klastyń oqýshysy edi. Júzi jaınap, eki kózi ottaı janyp, jarq-jurq etip, aı mańdaıy jarqyrap, báıge atyndaı typyrshyp otyratyn. Sol kezdiń ózinde-aq esimi eldiń aýzynda bolatyn, jastardyń kóshin bastap júretin.

Besiktegi balanyń bek bolaryn

kim biledi,

Qaryndaǵy balanyń han

bolaryn kim biledi, –

degendeı, ol kezde Nursultannyń Prezıdent bolaryn kim boljady deısiz. Biraq jalyndap turǵan jigittiń túbi jaryp shyǵatynyn jurt sezetin edi.

Eldiń tilegimen, halqynyń qol­daýymen Nursultan Nazarbaev 1991 jyldyń birinshi jeltoqsanynda Qazaqstan Respýblıkasynyń Tuń­ǵysh Prezıdenti bolyp saılandy. Memleket ornatý, ony baıandy etý qıynnyń qıyny edi. Osy jaýapkershilikti qalyń eldiń ishinen sýyrylyp shyǵyp, moınyna aldy, óz taǵdyryn eliniń taǵdyrymen jalǵady, sóıtip halqynyń úzilgen úmitin jalǵady, shyraǵyn jaqty.

Egemendik alǵan jyldary daýryǵysyp qalpaǵymyzdy as­pan­ǵa laqtyryp qýanystyq. Qýanǵan da, qoryqqan da bir degendeı, esi shyq­qan el ne isterin bilmeı sherýge de shyqty. Sherýge ne úshin shyq­qandaryn bilgen de joq.

Men táýelsizdiktiń aldynda, egemendiktiń alǵashqy jyldarynda, alasapyran yzy-qıqy kezeńde, N.Nazarbaevtyń el úshin tún uıqysyn tórt bólgen mazasyz kúnderiniń, uıqysyz túnderiniń kýási bolǵan, jan tebirenisin de, kúızelisin de kórgen, janynda bolǵan, qolǵabys tıgizgen kisiniń birimin.

Elbasy únemi halqyna senip, halqyna arqa súıep keledi. Pre­zı­d­entti qoltyǵynan demegen de, demeıtin de, qoldaǵan da, qoldaıtyn da – týǵan halqy.

Elbasy saıasatynyń altyn arqaýy, basty ózegi – el birligi, eldiń yntymaǵy.

Memleket ornatý úshin bizge eń aldymen yntymaq, birlik, eldiń tynyshtyǵy kerek edi. Yryń-jy­ryńǵa jol bermeý kerek edi. Osy jol­dan Elbasy eshqashan taıǵan emes.

Odaq taraǵannan keıin burynǵy odaqtas respýblıkalardyń bári de daǵdarysqa ushyrady. Qalyptasqan kolhoz-sovhozdar ydyrady, zaýyt-fabrıkalar kúıredi, balabaqshalar, mektepter, mádenıet oshaqtary talan-tarajǵa tústi, ekonomıka quldyrady, el kúızelip, jurtty úreı bıledi. Aýyl ábirjip, jurt qal­jyrap, zııalylar jaýtańdap, jas­tar sandalyp qaldy, maskúnemdik, nasha­qorlyq, jezókshelik, ózge de indet etek aldy.

Neshe túrli arandatýshylar shyq­ty, jurtty ábirjitti, iritki sal­dy. Eldiń esi shyqty. Sherýler kóbeıdi. Túrli qozǵalystar paıda boldy. Adamnyń aqylyna syı­maı­tyn mıtıngiler qaptady. Nebir «sheshender» shyqty sýyrylyp, nebir «kósemder» shyqty kólbeń­dep. Neshe túrli gazetter shyǵa bas­tady. Qysqasy, jurt betimen ketti. Solardyń kóbi jańa ǵana táı-táı basyp, qaz-qaz turyp, tiler­segi dirildep, qulaǵy qalqaıyp kele jatqan táýelsizdikke demeý bolý­dyń ornyna bógeý boldy, kesirin tıg­izdi. Kóbiniń aýzynan aq ıt kirip, kók ıt shyqty. Eldi búlikke de sha­qyr­dy. Elbasyn balaǵattap ta jatty. Sóıtip júrip «Demokratııa qaı­da?!», dep aıqaı saldy. Osylaı eldiń de, erdiń de taǵdyry synǵa tústi.

Jurt erkimen júrdi, erkimen sóıledi, degenin istedi. Biraq demokratııa aýzyna kelgendi ottaý, oıyna kelgendi isteý emes ekendigin, demokratııa degenimiz ıntellektýaldy aqyldyń bıligi ekendigin bári birdeı túsine bermedi, túsingileri de kelmedi. Elbasy osynyń bárine shydady.

Jańa qoǵam, jańa zaman, jańa adam keldi. Oı-sana, turmys-tir­shilik ózgerdi. Tarıh, ádet-ǵuryp, dástúr qaıta jańǵyrdy. El jańardy, jer túledi. Memlekettiligimiz be­kidi, baıandy ishki, syrtqy saıasat or­nyqty. Nazarbaev taqqa mingen kúnnen bastap Qazaq atqa mindi.

Elordaly, Aq­ordaly, Elbasyly el boldyq. Osynyń bári de yntymaq pen bir­liktiń arqasy edi. Elbasy únemi elim dep emirenip, ne kórse de elimen birge kórip, birge jasasyp keledi.

Aýmaly-tókpeli zamanda bira­zymyz Elbasynyń janynan ta­byldyq. Bizdiń basymyzdy jańa memleket ornatý ıdeıasy biriktirdi. Esi shyqqan elge demeý bolyp, tize qosyp, jan aıamaı ultqa qyzmet jasadyq. Munymyzdyń ýaqyt úshin de, ult úshin de paıdasy az bolǵan joq. Ahýaldyń ornyǵýyna, jas memlekettiń irgesiniń berik qalanýyna shama-sharqymyzsha osylaı úles qostyq.

Memleket ornatý, ony qalyp­tastyrý, baıandy etý, álemge tanytý deıtin kúrdeli proseske qatysýdy Alla kez kelgen kisiniń peshenesine jaza bermeıdi. Men sol tusta bes jyl boıy memleketimizdiń rý­ha­­nııat salasyn – ıdeologııasyn bas­qardym. Halyq, memleket aldyn­daǵy aýyr da jaýapty min­detti abyroımen atqardym dep oı­laımyn.

1991 jyldyń 1 jeltoqsanynda Tuńǵysh Prezıdent saılaýyn ótkizdik. Saılaýdyń shtabyn basqarý da, Prezıdenttiń ınaýgýrasııasyn – taqqa otyrý rásimin ótkizý de maǵan júkteldi. Muny da abyroımen ótkizdik. Ony qazaq halqy da, tarıh ta umytpaıdy dep oılaımyn.

2004 jyly Aqordanyń ashylý saltanatynda da qalyń eldi quttyqtap, Elbasyna bata berý – meniń enshime tıgen edi. Ábish Kekilbaev, Aqseleý Seıdimbek úsheýimiz baryp, halyqtyń atynan batany men bergen edim. Muny da tarıh umytpaıdy dep senemin.

«Súıer ulyń bolsa, sen súı» dep Abaı aıtqandaı, Nursultan Nazarbaev qolpashtaýǵa da, qoldaýǵa da, qoshemetteýge de turatyn, qalaı maqtaýǵa da syıatyn kisi, ortasynan oıy ozǵan, qatarynan qalpy ozǵan azamat.

Prezıdent Nazarbaev – halqyn san myń jyldar izdegen muratyna jetkizgen, memlekettigimizdi ornatyp, ony damytyp, álemge tanytqan asa daryndy tulǵa.

Nursultan Nazarbaev – halqynyń bar qadir-qasıetin boıyna jıǵan: tilin, tarıhyn, mádenıetin, ádet-ǵurpyn, salt-dástúrin jetik biletin, ultyn jan-tánimen súıetin, halqynyń úmitin, senimin aqtap kele jatqan qalyń eldiń muńdasy, taǵdyrlasy, eliniń esiktegi basyn tórge shyǵarǵan, álemge keńinen tanylǵan, irgeli elderdiń basshylarymen sóıleskende sózi asatyn, egeskende eńsesin basatyn, eldeskende meıirin shashatyn aýzy ýáli, sózi dýaly saıasatker.

Nursultan Nazarbaev – jurtty sendire de, ılandyra da alatyn, óz elim meniń – ózegim deıtin qaıratker, adamzat tarıhyn tereń biletin, zamana aǵymyn jiti oılaıtyn, álemniń ozyq tájirıbesin utymdy paıdalanyp, ata-babadan qalǵan asyl ónegemen ádemi ushtastyryp kele jatqan strateg, táýelsizdik zamanynyń birneshe urpaǵyn ósirip kele jatqan tálimger, týǵan halqynyń Báıteregi, Kósemi, Kemeńgeri.

Kók túrktiń kindiginen jaral­ǵan­dardyń ishinen búginde ozyp týǵa­ny da – bizdiń Nursultan Nazarbaev.

Biz yqylym zamandardan beri Uly Dala tósinde san qıly taǵ­dyrdy basynan keshken, osy kúndi armandaǵan el edik. Saq Ata dáýi­rinde de, Qaǵanat, Handyq zamanynda da, áz Jánibektiń, er Abylaıdyń tusynda da esh urpaq munshalyqty baqytty, munshalyqty dáýletti kórgen joq. Arǵy-bergi zamanda Uly Dalada Nazarbaevtaı memleket ornatqan, jer júzine dańqy asqan tulǵa týǵan joq.

Búginde álem sanasatyn elge aınaldyq. Osynyń bárine kýá bolyp otyrǵan, osyndaı elde ómir súrip jatqan bárimiz de baqyttymyz.

Bir kezde jyǵylǵan Ordany qaıta tigý, qulaǵan týdy qaıta tikteý, eldiń eliniń ǵana, erdiń eriniń ǵana qolynan keletin is edi. Shúkir, búginde yntymaǵy jarasqan, egemendi elimiz bar, qulan jortsa tuıaǵy tozatyn, qyran ushsa qanaty talatyn ulan-baıtaq jerimiz bar, Abylaıdyń da amanatyn oryndaǵan erimiz bar. Eldiń aty – Qazaqstan, erdiń aty – Nursultan. Qazaqstan, Astana, Nazarbaev búginde bir-birinen bólinbeıtin tutas uǵymǵa aınaldy.

Elbasynyń endigi armany – Uly Dalada Máńgilik El ornatý.

Uly Dalada Máńgilik El ornatý ıdeıasy búgin ǵana týa qalǵan joq, yqylym zamandardan beri, el ornap, bılik paıda bolǵaly beri jalǵasyn úzbeı kele jatqan arman, kúlli adamzattyń asyl armany. Adam balasy ómir boıy jumaq jerdi, jumaq eldi, baqytty, erkindikti izdeýmen, ańsaýmen keledi. Ol – arman, tatýlyǵy jarasqan, bereke-birliktiń elin ornatýdyń, Máńgi El ornatýdyń ıdeıasy. Nazarbaev bul ıdeıany halqynyń baıyrǵydan beri jalǵasyp kele jatqan baıtaq tarıhynan alyp otyr. Ol – qoı ústine boztorǵaı jumyrtqalaǵan zaman, Túrk dúnıetanymyndaǵy О́túken, halqymyz armandaǵan Jıdeli Baısyn, Asanqaıǵy jelmaıaǵa minip sharq uryp izdegen Jeruıyq, baqytty ómir, baıandy tirshiliktiń mekeni. Qytaılar ózin Aspanasty elimiz deıdi, Japondar ózderin Kúnshyǵys elimiz deıdi, biz – Uly Dalanyń Máńgi Elimiz.

Arǵy-bergi tarıhta elim máńgi bolmasyn degen birde-bir memleket joq. Bári de sony armandaǵan. Biraq jete almaǵan. Bizge búginde eldi adastyrmaıtyn kompas kerek bolyp otyr, eldiń ilgergi úmiti kerek bolyp otyr, armanǵa jeteleıtin jarqyn ıdeıa, kúshti memlekettik ıdeologııa kerek bolyp otyr. Bul ıdeıany N.Nazarbaev eliniń táýelsizdigin qorǵaý úshin, egemendi Qazaqstandy damytý úshin, myńdaǵan jyldar boıy babalar qalyptastyrǵan danalyqty da, sheshendikti de, kósemdikti de qaıta jańǵyrtý úshin usynyp otyr, babalar jetkize almaǵan armanǵa elin jetkizsem dep usynyp otyr.

Osyndaı Uly ıdeıany júzege asyrý úshin aldymen el ishiniń tynyshtyǵy, halyqtyń yntymaq-birligi kerek. Munyń bárin júzege asyrý, táýelsiz qazaq elin kóziniń qarashyǵyndaı saqtaý, eń ozyq elderdiń qataryna qosý – bárimizdiń de abyroıly mindetimiz.

Bizdi syrttan kelip eshkim jarylqamaıdy, Jarylqasa Qazaqty Qazaq ǵana jarylqaıdy. Biz endi táýelsizdigimizdi saqtap qalý úshin, baıandy etý úshin ómir súrýimiz kerek. El qamy, halyq taǵdyryna qatysty isterde peıishke de, tozaqqa da birge kirýge tıispiz. Uly Dala aldyndaǵy jaýapkershilik bizdi búgin osyǵan shaqyryp otyr. Tarıhqa esesi ketken halqymyzdyń taǵdyry bizden osyny qajet etip otyr.

Opyq jesek, qorlyq kórsek ań­qaý­lyǵymyzdan, aqkóńildiligi­mizden, sengishtigimizden, alaýyz­dy­­ǵy­myzdan, jikshildigimizden kór­gen elmiz.

Bizge búgin bárinen de keregi – ba­balar ósıet etip ketken yntymaq pen birlik.

Yntymaq aldymen qazaqqa kerek. Biz endigi jerde toqsan taraý, qyryq jilikke bólinbeı, tutas ult bolyp uıysa túsýimiz kerek. Qazaq úsh júzge bólinbeıdi, Úsh júzden quralady dep ómir súrýimiz kerek. Bizge osy jarasady, qazaqtyń kósegesin osy kógertedi. Bizdi Máńgi Elge osy aparady. Basqa jol joq.

Bıyl táýelsizdigimizge 26 jyl bolady. Kelesi jyly Astana 20 jasqa tolady. Biz kúni keshe ǵana óńimiz túgili túsimizge de kirmegen ǵajaıyp qalanyń tórinde otyrmyz. Qııal-ǵajaıyp ertegileri jete almaǵan shyndyqty bastan keshirip otyrmyz.

Astana búginde qulashyn kókke sermep, qanatyn keń jaıyp, keshegi saqtar men ǵundardyń, baıyrǵy túrikterdiń qarashańyraǵy Deshti Qypshaqty, baıtaq qazaq jerin kún ótip, kún asqan saıyn, aı ótip, aı asqan saıyn, jyl ótip, jyl asqan saıyn nurlandyryp, týǵan elimizdiń asqaq kelbetine, aıbaryna, egemendigimizdiń sımvolyna aınaldy.

Tuńǵysh Prezıdent kúni, Táýelsizdik meıramy, Astananyń 20 jyldyǵy qutty bolsyn. Elimiz aman, jurtymyz tynysh bolsyn.

Dalamyz myńǵyrǵan maldy bolsyn,

Jylqymyz jaldy bolsyn,

Jastarymyz qatarynyń aldy bolsyn!

Kıgenderiń – sándi,

Jegenderiń – dámdi,

Júris-turystaryń – mándi,

Eldigimiz Máńgi bolsyn!

Tiregimiz de,

Tilegimiz de,

Júregimiz de bir bolsyn!

Myrzataı JOLDASBEKOV