Biraq, ókinishke qaraı, Jambyl aýyldyq aýmaǵynda Jańatań, Áıteı shaǵyn aýyldaryn qosqanda bar-joǵy 1267 adam qalypty. Turǵyndar sanynyń azaıyp ketýine oraı, qazir aýdan ákimdigi ońtústik oblystarǵa baryp, aýyldaryna sol jaqtan otbasylardy kóshirip ákelý jumystaryn qolǵa alypty.
Elge el qosylsa qut. Osyndaı ıgi tilekpen biz de jýyrda ǵana Lebıaji aýdanyna baryp qaıttyq. Negizi, aýdan oblys ortalyǵyna jaqyn ornalasqan. Aýyldary, aýdan ortalyǵy Omby-Maıqapshaǵaı baǵytyndaǵy Semeı arqyly Qytaıǵa jetetin halyqaralyq joldyń boıynda. Bıyl úlken jol jańaryp, jarqyrap jóndeýden ótipti.
Jolsapar barysynda aýdannyń Jambyl, Iаmysh, Qyzylásker dep atalatyn aýyldarynda atqarylyp jatqan áleýmettik-turmystyq sala jumystarymen tanystyq. Jalpy, óńir boıynsha asqabaqtyń, qarbyzdyń túrli sorttaryn ósirýmen aty shyqqan aýyldar da bar. Aýdan ortalyǵy Aqqýlyda, Besqaraǵaı, Chernoe, Malybaı aýyldaryna ortalyqtandyrylǵan sý qubyry tartylypty.
– Budan basqa, Sharbaqty, Shabar, Iаmyshev jáne Tilektes aýyldarynda KBM qondyrǵylary jumys istep tur. Ortalyq sý júıesine qosylmaǵan 13 aýylda aýyz sý qory naqtylandy. Sharbaqty, Shabar, Shaqa aýyldaryna ortalyqtandyrylǵan sý qubyryn tartý úshin oblystyq bıýdjet qarajaty esebinen jobalaý-smetalyq qujaty ázirlendi, qazir saraptamalyq komıssııanyń qaraýynda, – deıdi aýdan ákimi Ernur Áıtkenov.
Aıtsa aıtqandaı-aq, Jambyl aýylyna kelgenimizde jaqynda ǵana paıdalanýǵa berilgen sý qubyry nysanyna baryp kórdik. Qurylys barysynda sý tartqysh 2 munara, uzyndyǵy 9000 metrdi quraıtyn, dıametri 110 mm negizgi qubyr, 118 negizgi temir-beton qudyq, 114 úıge sý jetkizý qudyǵy salynypty. Sý tazartý, sý alý qurylǵylary ornatylǵan alań qorshalyp, syrlanǵan, elektr qýaty tartylypty. Aýyldyń 3 turǵyny turaqty jumysqa ornalasypty. Aýylda úıge sý jetkizip bergen mundaı qurylys ómiri bolmaǵan dep te jatyr turǵyndar.
Qurylys bıylǵy jyldyń sáýir aıynda ǵana bastalypty. Jergilikti «AıSý Melıorasııa» JShS-men quny 330 mıllıon 375 myń teńgege kelisimshart jasalǵan. Aýyl ákimdiginiń aqparatynsha, 283 mıllıon 361 myń teńge ıgerildi. Onyń ishinde 217 mıllıon 450 myń teńge respýblıkalyq bıýdjetten, 65 mıllıon 911 myń teńge jergilikti bıýdjetten bólingen.
Biz qaladaǵydaı sý kelip, as bólmede ydys jýyp jatqan Qadısha Jumanbaevanyń úıine kelip, qutty bolsyn aıtyp shyqtyq. Qadıshadan basqa birqatar otbasy barlyq qurylǵylaryn ornatyp alypty, úılerine sý kelip tur. Qalǵan turǵyndar da úılerine sý tartý jumystaryn aldaǵy kóktemge josparlap otyr. Jaqsy-aq. Biraq, aýdan ortalyǵynyń irgesinde turǵan Jambyl aýylynyń ishinde, kireberis kóshesinde jınaqylyq, uqyptylyq joqtyǵy, nazarda tys qalǵany baıqalady.
– Qazir aýdan ákimdigi ońtústik oblystardan kóship kelýshilerge aldyn-ala osylaı áleýmettik jaǵdaılar jasaýdamyz. Aýdanda 13 myńdaı halyq turady, 23 aýyldyq aýmaq bar. Osy aýyldarǵa kóship keletin otbasylardy ornalastyramyz. Bıyl jyl sońyna deıin Iаmyshev aýylyndaǵy sý qubyrynyń qurylysy aıaqtalady. Jobalar iske qosylǵanda, turǵyndardy ortalyqtandyrylǵan aýyz sý jetkizý kórsetkishin 52,7 paıyz bolmaq, – deıdi aýdan ákimi.
Farıda BYQAI,
«Egemen Qazaqstan»
Pavlodar oblysy,
Lebıaji aýdany