Ortalyq kommýnıkasııalar qyzmetinde ótken baspasóz máslıhatynda Shyǵys Qazaqstan oblysynyń ákimi Danıal Ahmetov aımaqtyń áleýmettik-ekonomıkalyq damýy, Elbasy N.Á. Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna joldaýynyń, sonymen qatar «Rýhanı jańǵyrý» baǵdarlamasynyń júzege asý barysyna toqtaldy.
«Shyǵys Qazaqstan oblysy ákimdiginiń aǵymdaǵy jylǵy jumysy Elbasy Nursultan Ábishuly Nazarbaevtyń ekonomıkalyq ósimniń jańa modelin qurý jáne qoǵamdyq sanany jańǵyrtý jónindegi mindetterin iske asyrýǵa jumyldyrylǵan. Oblys ekonomıkasy turaqty damyp keledi. Jalpy óńirlik ónim jyl basynan beri 102 paıyzǵa ósti. Bul aýyl sharýashylyǵy óniminiń 102, qurylys jumystarynyń 108 paıyzǵa ulǵaıýy esebinen júzege asyp otyr. 234 myń sharshy metr turǵyn úı paıdalanýǵa berildi, ósim 104 paıyzdan asty. О́nerkásip ónimderiniń kólemi 100,1 paıyzǵa ósti. Mys rýdasyn óndirý 134 paıyzǵa, tas kómir óndirý 116 paıyzǵa artty. Shaǵyn jáne orta bıznestiń ónerkásip óniminiń barlyq kóleminen alatyn úlesi 10 paıyz (113 mlrd. teńge). Al iri bıznestiń úlesi 90 paıyzdy (1 trln 100 mln teńge) quraıdy. Negizgi kapıtalǵa salynǵan ınvestısııa 107 paıyzǵa ulǵaıdy», dedi óńir basshysy.
Sonymen qatar ol negizgi kapıtalǵa salynǵan ınvestısııa 107 paıyzǵa ulǵaıǵanyn tilge tıek etti.
«Shaǵyn jáne orta bıznes sýbektileriniń sany 103 paıyzdan asty. Naqty sektordyń turaqty ósimi, memleket kirisine aýdarymnyń 115 paıyzǵa (245 mlrd. teńge) artýyna yqpal etti. Turǵyndardyń aqshalaı kiristeri 112 paıyzǵa artty, aılyq ortasha eńbekaqy 120 myń teńgege jetti. Jeke tulǵalardyń depozıtteri 115 paıyzǵa ulǵaıdy. Jumyssyzdyq 4,8 paıyz deńgeıinde. Kásipkerlikti qoldaý kartasy sheńberinde bıyl 6 joba iske asyrylýda. Barlyq somasy 381 mlrd 400 mln teńgeni quraıdy. 4 joba qoldanysqa berildi. 1560 jumys orny quryldy. Olardyń ishinde, álemdegi asa irilerdiń biri - Aqtoǵaı taý-ken baıytý kombınatynyń qurylysy, О́skemen armatýra zaýytynda óndiristi jańǵyrtý. Jyl sońyna deıin qalǵan 2 jobany aıaqtaý josparlanyp otyr. Indýstrııa-ınnovasııalyq damý baǵdarlamasyn iske asyrý jyldarynda 46 joba oryndaldy. 2020 jylǵa deıin, ınvestısııa kólemi 393 mlrd teńgeni quraıtyn, taǵy 33 jobany iske asyryp, 11 300 jańa jumys ornyn ashý kózdelýde», dedi D.Ahmetov.
Raýan QAIDAR,
«Egemen Qazaqstan»