Búgin Astana qalasy Esil aýdanynyń «Jańa Ilınka» turǵyn alabynda qatty otynda peshpen jylytýdyń jaramsyzdyǵynan 2 eresek jáne 3 bala ys tıip, orta deńgeıli aýyrlyqpen aýrýhanaǵa jatqyzyldy, dep habarlaıdy QR IIM TJ komıtetiniń baspasóz qyzmeti.
Kún sýytqaly beri suıyq jáne qatty otynmen pesh jaǵý kezinde halyq qarapaıym qaýipsizdik erejelerin saqtaı bermeıdi.
«Otynnyń tolyq janbaýynan aýada ýly gaz paıda bolady. Peshtegi tútin shyǵatyn jerdi kúni buryn jabý kezinde ýlaný jıi bolady. Bıyl 1-28 qarasha aralyǵynda turǵyn-úı sektorynda 31 ýly gazdan zardap shegý oqıǵasy tirkeldi, sonyń ishinde qatty otynmen janatyn peshtiń aqaýlyǵy saldarynan 26 oqıǵa, gaz ballonda redýktordyń jáne gaz kolonkasynyń aqaýlyǵy saldarynan 5 oqıǵa. Bul rette 43 adam (onyń ishinde 11 bala) ýlanyp, aýrýhanaǵa jatqyzyldy, 10 adam (barlyǵy eresekter) oqıǵa ornynda kóz jumdy» delingen baspasóz habarlamasynda.
Shyǵys Qazaqstan – 4, Soltústik Qazaqstan – 4, Jambyl – 4, Almaty – 4, Pavlodar oblystarynda – 2, Astanada – 2 gazdan ýlaný oqıǵalary tirkelgen. Qyzylorda, Aqmola, Qostanaı, Batys Qazaqstan, Aqtóbe, Qaraǵandy oblystarynda jáne Almaty qalasynda da bolǵan.
Ýlanýdyń negizgi belgileri – bas aýrý, samaıda soqqylar, júrek aıný, uıqyshyldyq, az ýaqytqa talyp qalýdan bastap sal aýrýlarǵa, esten taný, tynys alý men mı qan aınalymynyń buzylýymen birge komatozdy kúıge deıin bolady. Aýyr jaǵdaılar júrektiń qyzmetin toqtatýy múmkin. Zardap shekken adamdy dereý aýrýhanaǵa jatqyzý qajet.
Dáriger kelgenshe naýqasty taza aýaǵa shyǵarý kerek. Keıin stasıonarda ottegini uzaq demmen qabyldaý, apparatpen jasandy tynys alý ótkiziledi; aǵzanyń zardap shekken júıeleriniń tirshilik áreketin qalpyna keltiretin quraldar qoldanylady.