Búgin Temirtaý qalasynda Qaraǵandy memlekettik ındýstrııalyq ýnıversıtetinde Qazaqstan Respýblıkasynyń Birinshi Prezıdenti Nursultan Ábishuly Nazarbaevtyń jáne 1967 jylǵy túlekterdiń JOO bitirgenine 50 jyldyq mereıtoıyna arnalǵan «Qazaqstannyń Úshinshi jańǵyrýy – jańa tujyrymdama jáne qazirgi zamanǵy sheshimder» atty IX halyqaralyq ǵylymı-praktıkalyq konferensııa ótti.
Jıynǵa Qazaqstan Respýblıkasynyń Bilim jáne ǵylym mınıstri E.Saǵadıev qatysty. Mınıstr konferensııaǵa qatysýshylardy alda kele jatqan Tuńǵysh Prezıdent kúnimen quttyqtap, Elbasynyń quttyqtaý hatyn oqyp berdi.
Konferensııanyń ashylýymen quttyqtaýshylar qatarynda tuńǵysh Syrtqy ister mınıstri, Qazaqstan Respýblıkasynyń Tótenshe jáne ókiletti elshisi, professor T.Súleımenov bastaǵan Elbasynyń seriktesteri boldy. Jıyn barysynda Memleket basshysynyń seriktesi, zaýyt-JTOO túlegi, Qazaqstan Respýblıkasynyń ǵylym jáne tehnıka salasynda Memlekettik syılyqtyń ıegeri Q.Sarekenov konferensııanyń mańyzy men maqsatyna keńinen toqtaldy.
Keleli keńesti aımaq basshysy E.Qoshanov júrgizip otyrdy. Kún tártibinde Qazaqstandaǵy Úshinshi jańǵyrtýdy júzege asyrý quraly retinde qoldanylatyn ınnovasııalyq jáne eńbeksyıymdylyqty tehnologııalar jaıy sóz boldy. Sondaı-aq, joǵarǵy jáne joǵarǵy oqý orynan keıingi bilim berý salasynda kadrlardy daıyndaý arqyly adamı kapıtal sapasyn jaqsartý máselelerin talqylady.
Baıandamashylar joǵarǵy oqý oryndaryn «Rýhanı jańǵyrý» Baǵdarlamasyn júzege asyrýǵa arnalǵan qoǵamdyq sanany jańartý ortalyǵy retinde qabyldaýdy usyndy.
Prezıdenttik «Týǵan jer» baǵdarlamasy sheńberinde tabıǵatty paıdalaný jáne qorshaǵan ortany qorǵaý máseleleri de jıynnyń ózegine aınaldy.
Mıras Asan,
«Egemen Qazaqstan»
Temirtaý qalasy