Búgin elordanyń № 49 orta mektebinde kúrestiń birneshe túrimen aınalysýǵa arnalǵan shaǵyn zaldy ashý saltanaty ótti dep habarlaıdy Astana ákimdiginiń medıa ortalyǵy.
Kúresten shaǵyn zaldy ashý Elbasynyń «Bolashaqqa baǵdar: Rýhanı jańǵyrý» atty baǵdarlamalyq maqalasynyń «Týǵan jer» jobasynyń aıasynda múmkin boldy.
Memleket basshysynyń tapsyrmalaryn júzege asyrý maqsatynda qala ákimdiginiń, bilim basqarmasynyń qoldaýymen «Men sportpen birge ósemin» qoǵamdyq qory men «Stalnaıa marka» JShS joǵaryda atalǵan zaldyń ashylýy men jabdyqtardyń ornatylýyna kómegin tıgizdi.
№49 orta mekteptiń dırektory Danara Jomartovanyń aıtýynsha, zamanǵa saı quraldarmen jabdyqtalǵan shaǵyn sport zalynda kúrespen aýdandaǵy basqa mektepterdiń oqýshylary da shuǵyldana alady. Onyń pikirinshe, №49 mekteptiń janyndaǵy qazaq kúresimen aınalysýǵa múmkindik beretin sport zaly bolashaqta bul jerden túrli dárejedegi chempıondardy kóptep shyǵarýǵa túrtki bolmaq.
«Mektebimizde qazaq kúresimen aınalysatyn 4 top bar. Ár topta 15 bala jattyǵady. Jattyǵýlar sabaqtan tys ýaqytta ótedi. Jattyǵýlar tegin. Sport zaly balalardyń bos ýaqytyn tıimdi ótkizýge septigin tıgizedi. Máselen, bizdiń mektebimizden álem chempıony, respýblıka chempıony retinde shyqqan jáne shyǵyp jatqan oqýshylarymyz kóp. Degenmen, №49 mektep elordamyzdyń shalǵaı aýdanynda ornalasqandyqtan balalarymyzdyń qala ortalyqtaryndaǵy sporttyq úıirmelerge barý múmkindigi az. Sondyqtan bul biz úshin jańa sport tarlandarynyń jańa esimderin shyǵarýdyń zor múmkindigi», - dep bólisti Danara Jomartova.
Shaǵyn zaldy Saryarqa aýdany ákiminiń orynbasary Talǵat Rahmanberdi men qazaq kúresinen halyqaralyq dárejedegi sport sheberi, «Qazaqstan Barysy» respýblıkalyq týrnıriniń tuńǵysh jeńimpazy Ulan Rysqul saltanatty túrde ashqan bolatyn.