Almatyda Fýrmanov kóshesiniń ataýy Nursultan Nazarbaev dańǵyly bolyp ózgertildi, dep habarlaıdy egemen.kz.
Bundaı sheshimdi turǵyndardyń ótinishi boıynsha VI shaqyrylymdaǵy Almaty qalalyq máslıhatynyń sessııasynda QR Úkimeti janyndaǵy Respýblıkalyq onomastıkalyq komıssııa men qalalyq onomastıkalyq komıssııa qabyldady.
Sessııa kezinde Almaty ákimi Baýyrjan Baıbek onomastıkalyq komıssııa qaraýyna Fýrmanov kóshesiniń ataýyn Nazarbaev dańǵyly etip ózgertý týraly ótinish kóp túskenin aıtty. Sondaı-aq, komıssııa ataýy qaıtalanatyn 112 kósheni ózgertý týraly usynystardy da qarady.
«2018 jylly Astananyń 20 jyldyǵyn toılaımyz. Búgingi kúni Elbasynyń sol kezdegi Astanany kóshirý týraly sheshiminiń qanshalyqty dana sheshim bolǵanyn túsinýge bolady. Bul sheshimniń mańyzdylyǵy ekonomıkalyq reformalarmen birge odan saıyn arta tústi. Ol Eýrazııa júregine aınalǵan Astananyń damýyna ǵana emes, Almatynyń órkendeýine da tyń serpin berdi. Elbasynyń qoldaýynyń arqasynda júrgizilgen júıeli ekonomıkalyq reformalardyń nátıjesinde qala ekonomıkasy 100 ese, ShOB sýbektileri sany 130 ese artty. 1990 jyldardyń basynda Almaty JIО́-niń 1/9 bóligin qamtamasyz etetin. Al qazir bul kórsetkish 1/5-ke jetti. Búginde Almaty – aımaqtyq magnıt, Orta Azııanyń iri qalalarynyń biri», - dedi Baýyrjan Baıbek.
Qala ákimi Memleket basshysy Almaty qalasynda Konstıtýsııa, Ulttyq valıýta, Qarýly kúsh jasaǵyn qurý, memlekettik rámizderdi bekitý, Semeı polıgonyn jabý sııaqty talaılaǵan tarıhı sheshimderdi qabyldaǵanyn aıtyp, bul usynystyń jaıdan jaı jasalmaǵanyn aıtty.
«Elbasy abyroıynyń arqasynda Qazaqstan halyqaralyq daǵdarystardy sheshýde basty ról atqaratyn elge, senimdi serikteske aınaldy. Ol kisi álemdik dárejedegi ıadrolyq qarýdan bas tartýǵa usynys jasaǵan, álemdi ıadrolyq qarýdan aryltýǵa úles qosqan birden-bir tulǵa. Men áriptesterimniń pikirine qosylamyn. Búgingi Fýrmanov kóshesiniń ataýyn berý týraly sheshim der kezinde ári durys qabyldanǵan sheshim», - dedi ákim.
Aıta keteıik, elimizde tuńǵysh ret Elbasy atyna kóshe berlip otyr. Al ózge memleketterde QR Prezıdenti N.Á.Nazarbaevtyń esimi alǵash ret 10 jyl buryn Iordan koroldiginiń Amman qalasynda jáne Sheshen Respýblıkasynyń Groznyı qalasyndaǵy kóshege berilgen bolatyn. Elbasy atyndaǵy kósheler Túrkııadaǵy birneshe qalada jáne Tatarstandaǵy Qazan qalasynda da bar.