Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasy búginde halyqtan keń qoldaý taýyp, aýdan ortalyqtary men aýyldy jerlerde ıgi sharalardyń ótýine sep bolyp otyr. Maqalada negizgi alty baǵyt qamtylyp, týǵan jerdiń tarıhyn bilýge, týǵan jerge tý tigýge úndeıtin kesek oılar aıtylǵan. Jalpy, bolashaqqa baǵdar beretin ári rýhanı jańǵyrýǵa úndeıtin baǵdarlamalyq maqalanyń mańyzy kún sanap artyp, jalpy el úshin, jer úshin negizgi temirqazyqqa aınaldy.
Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasyn qoldaý maqsatynda Áýlıeata óńirinde «Týǵan jerge týyńdy tik!» aksııasy bastaý aldy. Taraz qalalyq mádenıet úıinde maqala aıasynda «Meniń qalam!» atty patrıottyq is-shara uıymdastyryldy. Atalǵan sharaǵa shahar basshysy Rústem Dáýlet qatysyp, Elbasy maqalasynyń qundylyǵyna toqtaldy.
Sondaı-aq shara barysynda LED ekran arqyly Elen Álimjan, Meırambek Tólepbergen, Darııa Qojamjarova, Qarjaýbaı Bekbolatov, Elmıra Myrza-Ǵalı jáne Parıda Mamedova sııaqty óńirimizge belgili azamattar Memleket basshysynyń atalǵan maqalasy tóńireginde oı qozǵap, ózderiniń pikirlerin bildirdi. Sonymen qatar «Týǵan jerge týyńdy tik!» aksııasy aıasynda kóne Taraz boıynsha atqarylyp jatqan jumystarǵa toqtalǵan qalalyq máslıhattyń hatshysy Batyrbek Qulekeev, Rýslan Kan, Narıman Máýlenov, Talǵat Mananov, Aıdar Dýzanov, Shambylhan Úsenbaev jáne Jumabek Bólekbaev sııaqty qalalyq máslıhattyń alty depýtaty óz qarajaty esebinen 15 mıllıon teńgege qalaǵa qajetti nysandar qurylysyn júrgizýge atsalysatynyn jetkizdi. Sondaı-aq «Qazfosfat» jaýapkershiligi shekteýli seriktestiginiń bas dırektory, Qazaqstannyń Eńbek Eri Muqash Eskendirov sport alańshalaryn salyp berýge daıyn ekenin aıtsa, «Bınom» jaýapkershiligi shekteýli seriktestiginiń atqarýshy dırektory Qýat Baqqaraev shyn máninde muqtaj azamatqa bir páter alyp beretinin bildirdi.
Bilimdi jastardy qoldaý maqsatyndaǵy oılar da aksııa barysynda sóz boldy. Sonymen qatar salamatty ómir saltyn qalyptastyrý, ol úshin jastardyń ýaqytyn tıimdi paıdalaný kerektigi de aıtyldy. Bul oraıda Taraz ınnovasııalyq-gýmanıtarlyq ýnıversıtetiniń rektory Erbolat Saýryqov 5 mıllıon teńgege 5 stýdentti shákirtaqymen qamtamasyz etetinin aıtty. Sonymen qatar ýnıversıtet tarapynan «Taraz» fýtbol klýbynyń qosalqy 8 oıynshysyna 8 mıllıon teńge shákirtaqy taǵaıyndalatyn bolady.
Áýlıeatanyń ánsúıer qaýymy da bul kúni jas ónerpazdardyń oryndaýyndaǵy «Tarazym meniń», «Qazaǵymsyń», «Qazaǵym-aı», «Týǵan jer» ánderin tyńdap, jastardyń da patrıottyq sezimderine kýá boldy. Sondaı-aq osy kúni Elbasy maqalasyna baılanysty Taraz tórinen bastalǵan «Týǵan jerge týyńdy tik!» aksııasy «Aýylym – altyn besigim!» degen atpen Jambyl oblysynyń barlyq aýdandarynda jalǵasyn tapty.
Elbasynyń «Bolashaqqa baǵdar: rýhanı jańǵyrý» atty maqalasynan týyndaıtyn barlyq mindetterge Baızaq aýdany da barynsha atsalysýǵa daıyn. Osy topyraqtan shyǵyp, búginde ártúrli salada eńbek etip júrgen azamattardyń da rýhanı jańǵyrý boıynsha aıtary bar. Sonymen qatar shara aıasynda aýylsharýashylyq ónimderiniń jármeńkesi, kitap kórmesi, beıneleý óneri týyndylarynyń kórmesi uıymdastyryldy. Áýeli kópshilik aýdan týraly túsirilgen arnaıy fılmdi tamashalap bolǵan soń aýdan ákimi Rahmatilda Rahmanberdıev týǵan jer týraly, ult úshin týǵan jerdiń qadiri týraly sóz sóıledi.
Budan keıin forýmǵa arnaıy kelgen ataqty sportshy, grek-rım kúresinen qazaqtan shyqqan tuńǵysh Olımpıada chempıony Jaqsylyq Úshkempirov óziniń týǵan jeri Baızaq aýdany, Tegistik aýyly jaıly tebirene sóıledi. Sondaı-aq ol Dıhan aýylyna sport keshenin salyp berýge ýáde berdi. Al oblys ákiminiń orynbasary Erqanat Manjýov Elbasy maqalasynan týyndaıtyn forýmnyń mańyzdylyǵyna toqtala kele, týǵan jerge qoldaý kórsetken barlyq azamattarǵa alǵys aıtty.
Budan keıin «Týǵan jerge týyńdy tik!» aksııasy Talas aýdanynda jalǵasty. Oǵan jergilikti sharýa qojalyqtarynyń tóraǵalary, kásipkerler, jergilikti qalamgerler, aýdandyq máslıhattyń depýtattary men osy óńirden shyqqan basqarma basshylary qatysty. Jıyndy ashqan aýdan ákiminiń orynbasary Kádirbek Sadýbaev el táýelsizdigin tuǵyrly etý maqsatynda rýhanı jańǵyrýdyń asa mańyzdy ekenin atap ótti. О́z kezeginde sóz alǵan «Alashbaı-Tájibaı» sharýa qojalyǵynyń tóraǵasy Marat Alashbaı týǵan jerinde eńbek etip, demeýshilik jasap júrgenin áńgimeledi. Al aýdandyq múgedekter qoǵamynyń tóraıymy E.Soı áleýmettik jaǵynan az qamtylǵan otbasylaryna únemi kómek qolyn sozyp kele jatqanyn jetkizse, Eseıhan aýylynan shyǵyp, búginde «Taraz Qurylys Dızaın» jaýapkershiligi shekteýli seriktestiginiń basshysy bolyp otyrǵan Nurǵazy Bekbergenov ótken jyly óz qarajatyna meshit salǵanyn, endi bıyl sport alańyn salýǵa nıetti ekenin aıtty. Al kásipker Talǵat Dýanbek jyl saıyn 16 otbasyn jumyspen qamtyp, týǵan jerdi túletýge atsalysyp júrgen azamat.
Atalǵan aksııa Sarysý aýdanynda da jalǵasyn tapty. Jıyndy aýdan ákiminiń orynbasary Dınara Asanova sóz sóılep ashyp, forým jumysyna sáttilik tiledi. Aýdandaǵy iri kásiporyn bolyp sanalatyn «Qarataý» ken óńdeý kesheniniń eńbekkerleri de rýhanı jańǵyrý is-sharalaryna aıtarlyqtaı úles qosyp keledi. Kásiporyn basshysy Muratqalı Sársenov týǵan jerdi túletý úshin ujymnyń eshqashan aıanyp qalmaıtynyn aıtty. Al Sarysý aýdanyn kórkeıtýde aıtarlyqtaı jumys jasap otyrǵan Aıtýǵan Ryspanov, Dáýletaldy Janbaev, Murat Tólepbekov jáne ózge de kásipker azamattardyń esimderi qurmetpen ataldy.
Áýlıeata óńirindegi irgeli aýdandardyń biri Qordaı aýdany. Halyqaralyq Almaty-Tashkent kúrejolynyń boıynda ornalasqan aýdan barlyq salada da serpindilik tanytyp keledi. «Aýylym – altyn besigim!» aksııasy aıasynda sóz alǵan aýdan ákimi Bolatbek Baıtóle patrıotızmniń týǵan jerińe, ósken aýylyńa qurmet ekenin aıtyp ótti. Máselen, búginde Shymkent qalasynda kásippen aınalysyp júrgen Qaırat Moldaseıitov týǵan aýyly Qarakemerden meshit, balabaqsha, sport keshenin salyp bergen azamat. Al Betqaınar aýyldyq okrýgindegi «Almaz» sharýa qojalyǵynyń basshysy Jumabek Esjıǵanov aýyl syrtyndaǵy sazdy kólshikti tazartyp, aınalasyn qurǵatyp kóztartarlyq demalys ornyn ashty. Sol sııaqty Asqar Jumabaev ortalyq saıabaqqa sporttyq trenajerler ornatsa, Sársebek Salybaev jaǵdaıy tómen tórt otbasyna turǵyn úı salyp bergen. Mundaı jumystar Qordaı aýdanynda kóptep sanalady.
Moıynqum aýdanynda ótken «Týǵan jerge týyńdy tik!» aksııasyn aýdan ákimi Baqytjan Núrkenov ashyp, barsha azamattardy quttyqtady. Munda da týǵan jerge tý tigý boıynsha atqarylyp otyrǵan jumystar barshylyq. Máselen, «Eren eńbegi úshin» medaliniń ıegeri, kásipker Oraq Piralıev Aqbaqaı orta mektebiniń jylý oryndaryn jańalap, mekteptegi 400 sharshy metr kitaphananyń ishi-syrtyn jáne mektep qorshaýyn zaman talabyna saı etip óz qarajaty esebinen jóndep bergen azamat. Sondaı-aq ol byltyr jeldiń qatty soǵýynan zardap shekken Shyǵanaq orta mektebiniń shatyryn 5 mıllıon teńgege jóndep, osydan 7-8 jyl buryn 24 mıllıon qarajatqa 230 adamdyq ashanasy bar meshit salyp bergen. Belgili kásipker jınalǵan kópshilikti týǵan jerdi ardaqtaýǵa, qurmetteýge shaqyrdy. Al óz sózinde aýdannyń qurmetti azamaty Nurkúl Ospanbekova, aýdandyq ardagerler keńesiniń tóraǵasy Jambyl Qalybaevtar jıynǵa kelgen jerlesterine alǵysyn bildirdi.
Osyndaı aıtýly shara Merki, Shý, Jýaly, T.Rysqulov jáne Jambyl aýdandarynda da jalǵasty. Merki aýdanyna arnaıy kelgen belgili mádenıettanýshy Murat Áýezov týǵan jeri týraly tebirene sóz sóıledi. «Merkiniń taza sýynyń, aýasynyń ózindik qasıeti bar» dep kópshilikti tebirentken Murat Muhtaruly barsha merkilikterdi týǵan jerdiń túleýine atsalysýǵa shaqyrdy. Odan keıin oblys ákiminiń orynbasary Ǵalymjan Ábdiraıymov, jýrnalıst-baspager Qaldygúl Ákimjanqyzy jáne «Sypataı batyr» jaýapkershiligi shekteýli seriktestiginiń dırektory Qanat Shaıhıev sóz sóıledi. О́z sózinde Qanat Shaıhıev Sypataı batyr aýylyndaǵy sport kesheni bolýǵa laıyqty úlken ashanany aýyl jáne aýdan turǵyndaryna tegin beretinin málimdedi. Al Shý aýdanynda «Týǵan jerge týyńdy tik!» jobasy aıasynda «Jan jylýy» atty qaıyrymdylyq jobasy uıymdastyrylyp, oǵan 1 mıllıon 920 myń teńge qarajat jumsalǵan. Nátıjesinde, 384 adamǵa qaıyrymdylyq kómek kórsetilgen. Munda da Almaty qalasyndaǵy «Sheber bıld» kompanııasynyń dırektory Bolat Saýranbaev, «Kompanııa Mark» jaýapkershiligi shekteýli seriktestiginiń dırektory Nıkon Kım jáne ózge de azamattardyń qatysýymen birqatar qurylys nysandary salynyp, el ıgiligine berilgen.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrý boıynsha kóptegen jumystar atqarylýda. Máselen, osy aýdannyń týmasy, Halyq qaharmany Baqytjan Ertaev №18 Málik Ǵabdýllın atyndaǵy orta mekteptiń sport zalyna qajetti zattardy syıǵa tartsa, elimizdiń tuńǵysh Eńbek Eri Aıagúl Mırazova ózi bilim alǵan Q.Qoshmanbetov atyndaǵy orta mekteptiń matematıka kabınetin jabdyqtap bergen. Al Almaty qalasynyń prokýrory, ádilet general-maıory Ǵabıt Mırazov mektepke sýburqaq kirgizip, mektep janynan fýtbol jáne voleıbol alańdarynan turatyn ashyq aspan astyndaǵy sport keshenin salyp berip otyr.
Rýhanı jańǵyrý aıasynda bastaý alǵan aıtýly shara T.Rysqulov aýdanynda jalǵasty. Aksııa barysynda týǵan jerdiń qasıetin óleńge arqaý etken belgili aqyn Qýandyq Sholaq, kásipker Qonys Saǵynbekov pen qajy Ápjapar Akımov týǵan jerge degen tolǵanystaryn jetkizdi. Sondaı-aq Mels О́zbekov atyndaǵy aýdandyq mádenıet úıi ónerpazdarynyń konserti de kópshilik kóńilinen shyqty. Al Jambyl aýdanynda da «Týǵan jerge týyńdy tik!» aksııasy óz deńgeıinde ótti. Aýdan ákimi Baqyt Qazanbasov iskerligimen el yqylasyna bólengen «Amangeldi» jáne «Qyzyl-Dıhan» óndiristik kooperatıvteriniń tóraǵalary Qasymhan Qanaev pen Nýrıtdın Begmanovqa jáne Qazaqstan Respýblıkasy oqý isiniń úzdigi Raıkúl Omarovaǵa qurmet kórsetip, aýdan ákiminiń Alǵys hatymen marapattady.
Hamıt ESAMAN,
«Egemen Qazaqstan»
Jambyl oblysy