Qostanaıda «Qostanaı» ındýstrııalyq aımaǵy ashyldy. Ol qalanyń batys bóliginiń syrt jaǵyna ornalasqan. 400 gektar aýmaqty alady. Indýstrııalyq aımaqtyń qurylýy úsh kezeńnen turady dep josparlanǵan. Alǵashqy kezeńde 120 gektar jerge salynatyn óndiris oryndary ıgeriledi, ınfraqurylymy salynady. Infraqurylymnyń quny 2,5 mıllıard teńgege baǵalanyp otyr. Qazir ashylǵan alǵashqy kezeńinde aımaqtyń ákimshilik-turmystyq kesheni, syrtqy kommýnıkasııalyq jumystary daıyn boldy. Ákimshilik-turmystyq keshende jalǵa alýshylar úshin 10 kabınet, 40 oryndyq ashana, 11 oryndyq qonaq bólmeler bar. Sonymen qatar aldaǵy ýaqytta ınvestorlarǵa ońaı bolýy úshin munda bank konsýltanttary, notarıýs, kásipkerlerge qajetti basqa qyzmet túrleriniń ókilderi otyratyn bolady.
Indýstrııalyq aımaqqa birinshi bolyp lıft quraldaryn óndiretin zaýyt salynyp jatyr. Qazir onyń qurylysy qyzý júrgizilýde. Osy jyldyń qyrkúıek aıynda qostanaılyq «Tobyl» áleýmettik-kásmipkerlik korporasııasy ekaterınbýrgtik kompanııamen «VEK Qazaqstan» atty birlesken kásiporyn qurǵan bolatyn. Ol kelesi jyldyń mamyr aıynan bastap lıft óndire bastaıdy.
«Kelesi jyldyń aqpan aıynda qural-jabdyqtardy ákelemiz, mamyr-maýsym aıynda alǵashqy ónimdi beremiz. Bizdi ınvestor retinde Qostanaı jaǵynyń jaǵdaı jasaýy qyzyqtyrdy. Qostanaı oblysynyń ákimshiligi barlyq máselelerdi jedel sheship berdi», dedi VEK kompanııasynyń bas dırektory Mıhaıl Molochnıkov. Bul ındýstrııalyq aımaqqa qonys teýip jatqan tuńǵysh ınvestor-kásiporyn. Taǵy da reseılik jáne qazaqstandyq kásiporyndardan aımaqqa ornalasýǵa usynystar túsýde.
«Aldaǵy eki jylda ındýstrııalyq aımaqqa keminde 10 ónerkásip kásiporny ornalasady. Biz bul aımaqqa qurylys óndirisi, avtobólshekter shyǵaratyn, azyq-túlik óndiretin kásiporyndar ornalasady dep josparlap otyrmyz. Ol úshin munda barlyq jaǵdaı jasalady», dedi oblys ákimi Arhımed Muhambetov ındýstrııalyq aımaqtyń ashylýynda.
Názıra JÁRIMBET, «Egemen Qazaqstan»
Qostanaı