Semeıdegi Nevzorovtar otbasy atyndaǵy kórkemsýret mýzeıinde «Dáýir. Kitap. Lebedev» atty kórme ashyldy.
Vladımır Vasılevıch Lebedev kórkem keskindemeshi, grafık- sýretshi, plakat salý, kitap jáne jýrnaldardy bezendirý óneriniń has sheberi. Lenıngradtyq kitap grafıkasy mektebiniń negizin qalaýshysy, bir kezderi ózi týraly bylaı dep aıtqan eken: «Meniń shyǵarmashylyǵymdy túsiný úshin meniń jıyrmasynshy ǵasyrdyń sýretshisi ekendigimdi este saqtaý qajet…
Meni sol zamannyń rýhanı aýasy qalyptastyrǵan. Meniń barlyq ıdeıalarym men oılarym sol kezeńde tamyr jaıyp jatyr…». Shyn máninde Vladımır Lebedev ómir súrgen ótken ǵasyrdaǵy jıyrmasynshy jyldardyń aıaǵy jáne otyzynshy jyldardyń basy asa kúrdeli jáne qaıshylyqqa toly shaq edi.
Sýretshi úshin erekshe shyǵarmashylyq belsendiliktiń, úzdiksiz izdenister men jańashyl sheshimderdiń ýaqyty boldy, osy kezeńde qaıtalanbas «lebedevtik» stıl qalyptasady. Mýzeı qorynda búginde sheberdiń 157 týyndysy saqtalýda, olardyń 108-i alǵash ret kópshilik nazaryna usynylypty. Bul – sýretshi zamandastarynyń kórkem jáne grafıkalyq portretteri, adamdar men janýarlardyń sýretteri, natıýrmorttar.
Ekspozısııada sondaı-aq ataqty orys aqyny Samýıl Marshaktyń syqaq týyndysy – «Mıster Tvıster» poemasy úshin salynǵan Lebedevtiń álemge áıgili ıllıýstrasııalary da oryn alypty. Bul kitap alǵashqy ret 1933 jyly jarııalanǵan.
Lebedevtiń kórmege qoıylǵan barlyq týyndylaryn 1990 jyldary sýretshiniń jesiri Ada Sergeevna Lazo-Grabenkodan Nevzorovtar otbasy atyndaǵy kórkemsýret mýzeıi satyp alǵan eken.
Raýshan NUǴMANBEK
SEMEI
Sýretterdi túsirgen avtor