Búgin Memleket basshysynyń qatysýymen ótken «Jańa ındýstrııalandyrý: qazaqstandyq barystyń qadamy» ulttyq telekópir barysynda Shymkent qalasynda ornalasqan kólik-logıstıkalyq ortalyǵyndaǵy «Continental Logistics Shymkent» A + sanatyndaǵy keshendi iske qosty.
Munda qurǵaq jáne klımattyq qoımalardan bólek, konteınerlik termınal, kedendik resimdeý aımaǵy men ilespeli qurylymdary bar.
Telekópirge Ońtústik Qazaqstan oblysynyń ákimi Janseıit Túımebaev pen «Qazaqstan temir joly» UK »AQ vıse-prezıdenti Sanjar Elýbaev jáne ortalyq qyzmetkerleri qatysty. Elbasyǵa jańa nysannyń mańyzdylyǵy týraly vıse-prezıdent baıandady.
«Qurmetti Prezıdent! Biz Shymkent qalasynda mýltımodeldi kólik-logıstıkalyq ortalyqtyń qurylysyn aıaqtadyq. Jyl saıyn shamamen 1 mln tonna júk ótkiziledi. Bizdiń ortalyq - Shyǵys-Batys, Ońtústik-Soltústik aǵynyna qyzmet etetin keden aımaǵy men tolyq servıstik jelisi qamtylǵan zamanaýı keshen. Nursultan Ábishuly, osy ınfraqurylymdyq jobany iske qosýǵa ruqsat etińiz!», -dep surady «Qazaqstan Temir Joly» UK» AQ vıse-prezıdenti Sanjar Elýbaev.
Mamandardyń aıtýynsha, «Batys Eýropa - Batys Qytaı» magıstrali men temirjol jelisine jaqyn ornalasqan «Continental Logitics Shymkent» jańa kóliktik-logıstıkalyq ortalyǵynyń geografııalyq turǵydan tıimdi ornalasýynda. Bul óńirdi kóliktik-logıstıkalyq hab retinde qalyptastyrýǵa jáne Qazaqstannyń aýmaǵy arqyly aınalymdy ulǵaıtýǵa kúshti serpin beretin júkterdi shoǵyrlandyrý jáne konsolıdasııalaý ortalyǵy retinde damytýǵa yqpal etedi.
Aıta ketý kerek, aımaqtyń júk jóneltýshiler úshin artyqshylyǵy Cross Docking mýltımodaldy qyzmet kórsetý júıesin engizýi. Bul júıe qoımalardaǵy qarapaıym júkterdi qospaǵanda, ásirese, úlken kólemde О́zbekstan, Tájikstan, Qyrǵyzstan men Reseıden jetkiziletin jemis-kókónis ónimderi sııaqty buzylatyn taýarlar úshin óte mańyzdy bolyp tabylady.
Qazirgi kezde jalpy aýmaǵy 92 gektardy quraıtyn «Ońtústik» kólik-logıstıkalyq ortalyǵynda ınvestısııa quny 35,6 mlrd teńge bolatyn 8 joba júzege asyrylýda. Aýmaǵy – 242 500 sharshy metrdi quraıdy. Munda kedendik rásimdeý, fıtosanıtarlyq jáne veterınarlyq baqylaý qyzmetteri bir tereze qaǵıdasymen júrgizilse, buǵan qosa ýaqytsha saqtaý qyzmeti de qarastyrylǵan.
Shymkenttegi atalǵan KLO halyqaralyq jáne respýblıkalyq júk aǵymyna qyzmet kórsetý, sondaı-aq, taýarlardyń qala men óńirlerge taratylýy úshin qoıma jáne ilespe qyzmetter usyný maqsatynda qurylǵan.