Parlament Senaty Halyqaralyq qatynastar, qorǵanys jáne qaýipsizdik komıtetinde «Damýǵa resmı kómek týraly» zańdy iske asyrý máseleleri boıynsha elimizdiń Syrtqy ister mınıstrliginiń basshylyǵymen kezdesý boldy.
Senat komıtetiniń tóraǵasy Darıǵa Nazarbaeva kezdesýdi asha kelip, jahandyq damýǵa kómektesý bizdiń elimizdiń syrtqy saıasatynyń mańyzdy salalalarynyń biri ekenin atap ótti. 20 jyl ishinde Qazaqstan 450 mıllıon AQSh dollary kóleminde kómek kórsetti.
«Bul salada júıeli kózqaras pen tıisti úılestirý bolmaǵandyqtan Qazaqstan zańnamasynda damýǵa resmı kómek uǵymy rettelmegen. «Damýǵa resmı kómek týraly» zań qabyldanǵannan keıin bul máseleler retteletin bolady», - dedi senator.
Osy tetiktiń jańalyǵyn eskere otyryp depýtattar damýǵa resmı kómek týraly zańnyń qanshalyqty tıimdi júzege asyrylǵany jáne ol eldiń ataq-abyroıyna paıdasy týraly aqparat surady.
«Damýǵa resmı kómek týraly» zańdy iske asyrý aıasynda atqarylǵan jumystar týraly Syrtqy ister mınıstriniń orynbasary Erjan Ashyqbaev baıandama jasady. Ol senatorlardan damýǵa resmı kómek salasynda «KazAID ulttyq operatoryn qurýdy qoldaýdy surady.
«KazAID» agenttiginiń qurylýy damýǵa resmı kómektiń ulttyq júıesiniń qajetti jáne mańyzdy salasy bolyp tabylady. «KazAID» kompanııasynyń tıimdi qyzmeti aımaqtaǵy elder arasynda Qazaqstannyń abyroıyn nyǵaıtady jáne kórshi elderdegi ekonomıkalyq jaǵdaıdyń jaqsarýyna yqpal etedi», - dedi E.Ashyqbaev.
Senatorlar Darhan Káletaev, Serik Jaqsybekov, Nurjan Nursıpatov, Tóleýbek Muqashev osy salany jetildirý boıynsha birqatar eskertýler men usynystar jasady.
Kezdesýdi qorytyndylaı kelip, Darıǵa Nazarbaeva halyqaralyq kómek kórsetýdiń mańyzdylyǵyna toqtaldy jáne túsindirý jumysyndaǵy kemshilikterdi atap ótti. «Qazaqstannyń gýmanıtarlyq jáne damýǵa resmı kómek kórsetý salasyndaǵy kúsh-jigeri álemde sonshalyqty tanymal emes. Bul oraıda Syrtqy ister mınıstrligi jetkilikti túrde jumys istemeıdi. Bul bizdiń elimizdiń abyroıy, sol arqyly bizdiń elimizdi halyqaralyq qoǵamdastyqtyń jasampaz múshesi retinde sıpattaıdy. Qazaqstan sııaqty damyp kele jatqan el úshin 450 mıllıon AQSh dollary kólemindegi kómek ájeptáýir járdem. Nelikten bul týraly ne qazaqstandyqtar, ne álem qoǵamdastyǵy bilmeıdi? Bul SIM men Úkimettiń jumysyndaǵy óte úlken olqylyq», - dedi komıtet tóraǵasy.