Qııalǵa qanat bitiretin ǵalamattyń biri óziniń qupııasyn ári barlyq qyry men syryn ishine búgip jatatyn sheti men shegi joq aspan álemi desek, qatelese qoımaspyz. Túngi juldyzdy aspan, kók júzine qonaqtaǵan ásem aı, qus jolyndaı saǵymdanǵan jeti qaraqshy, tań ata týatyn sholpan juldyz kimderdiń armanyn alysqa samǵatpady dersiz. Jeti qabat kóktiń syryn bilýge bala kóńildiń bári de qushtar bolǵany aıdan anyq. Aqtóbede budan tup-týra 50 jyl buryn ashylǵan planetarıı osy armandar men qııaldardy odan ári ushtaýǵa, jas óspirimderge juldyzdy álemniń astarly syryn uǵyndyrýǵa qyzmet jasap keledi.
Osydan jarty ǵasyr buryn qurylǵan aıryqsha ortalyqtyń dál búgingi kúni de elimizde eshqandaı balamasy bolmaı otyr. О́z qyzmetin táýelsiz elimizde derbes óz joly bar salalar retinde tanytyp úlgergen astranomııa jáne ǵarysh salalarymen tyǵyz baılanysty júrgizip otyrǵan Aqtóbe planetarııiniń joly aıyryqsha. Elimizdiń qoǵamdyq jáne mádenı ómirinde alatyn orny bólek. Bul erekshe ortalyq qazirgi kúni aspan denelerin zerdeleýge qatysty barlyq talaptarǵa jaýap bere alady. Ásirese onyń aldaǵy maqsatyn joǵaryda atalǵan salalarmen baılanystyrǵysy keletin jetkinshikterge tıgizetin shapaǵaty men taǵylymyna eshqandaı baǵa jetpeıdi. Atalǵan planetarııdiń dırektory Qorlan Bólekov bizge óz oı pikirin bylaısha jetkizdi.
-Qazirgi tańda ujymda jıyrma adam jumys jasaıdy. Bizde túngi aspanda jymyń qaqqan juldyzdarmen ishteı syrlasqysy keletinderge arnalǵan arnaıy bólme bar. Oǵan bir mezgilde elý adam syıa alady. Kim-kimde ózgeshe bir juldyzdar álemine kirýge qyzyǵýshylyq tanytqandar osy aradan kelgen maqsattaryna jete alady. Damýdyń búgingi qarqyndy kezeńi planetarııdegi tehnıkalar men qondyrǵylardy udaıy jańǵyrtyp turýdy qajet etedi. Búgingi kezde osyndaı joǵary talaptar údesinen shyǵýǵa umytylyp kelemiz.
Aqtóbe planetarııi jas talǵamaıdy . Onyń qyzmetimen tanysqysy kelgen úlken de kishi de munda aspan áleminiń qyr-syryna qanyǵa alady. Bul baǵytta arnaıy ashylǵan úıirmelerge qatysýǵa yqylas bildirgen ul-qyzdar da jetkilikti. Olardyń arasynda halyqaralyq olımpıadalarda júldeli oryndarǵa ıe bolyp júrgender de bar. Planetarııge kelýshiler qaı kezde de tolastaǵan emes. olar bul aradan juldyzdy álem-kúlli álem eken-aý degen oı jeteginde tarqasady.
Temir Qusaıyn
"Egemen Qazaqstan"
Aqtóbe