Astanada ótken RES 2026 jahandyq sammıti aıasynda Satbayev University ǵalymdary men «ECOTEC Engineering» kompanııasy otandyq ǵylymnyń ozyq jetistikterin tanystyrdy. EXPO ortalyǵyndaǵy ulttyq pavılondy aralaǵan Memleket basshysy Qasym-Jomart Toqaev pen ózge óńir basshylary qazaqstandyq ınjenerlerdiń sý tapshylyǵy men ekologııalyq qaýipsizdikti sheshýge baǵyttalǵan biregeı jobalaryna joǵary qyzyǵýshylyq tanytty, dep habarlaıdy Egemen.kz.
Erekshe nazar Satbayev University ekspozısııasyna aýdaryldy. Munda ýnıversıtet ǵalymdarynyń ǵylymı ázirlemeleri negizinde ECOTEC Engineering kompanııasymen birlesip júzege asyrylyp jatqan jobalar tanystyryldy. Bul jobalar Qazaqstanda ǵylymnyń qoldanbaly sıpat alyp, ekonomıkanyń strategııalyq salalarynda naqty nátıje berip otyrǵanyn kórsetti.
Ǵalymdardyń basty jańalyǵy – Ortalyq Azııada alǵash ret óndiriske engizilgen keri osmos membranalary men olardyń jumysyn qashyqtan baqylaıtyn RFID tehnologııasyna negizdelgen «aqyldy» júıe. Bul joba óńirdiń tehnologııalyq táýelsizdigin qamtamasyz etip qana qoımaı, Kaspıı teńiziniń sýyn tushylandyrý sııaqty strategııalyq mindetterdi sheshýge múmkindik beredi. Qazirgi ýaqytta Kaspıı teńizi jaǵdaıyna beıimdelgen jańa býyn membranalaryn ázirleý jumystary júrgizilip jatyr. Mańǵystaý oblysynda tájirıbelik-ónerkásiptik synaqtar ótkizý josparlanǵan.
Otandyq ǵalymdar qurǵaqshylyqqa tózimdi daqyldardy oılap tapty
Sonymen birge qazaqstandyq zertteýshiler jasandy ıntellekt negizinde jumys isteıtin aýa men sý sapasyn baqylaýdyń avtomattandyrylǵan monıtorıng stansııalaryn oılap tapty. Bul júıe ekologııalyq táýekelderdi aldyn ala boljap, sheshim qabyldaýǵa kómektesedi. Satbayev University ǵalymdarynyń Portý ýnıversıtetimen (Portýgalııa) birlesken zertteýleri otandyq tehnologııalardyń jahandyq naryqqa shyǵýyna jol ashyp, Qazaqstannyń ǵylymı-ınjenerlik áleýetin álemdik deńgeıde moıyndatty.
Jalpy alǵanda, RES 2026 alańynda usynylǵan bastamalar Qazaqstan ǵylymynyń jańa sapalyq deńgeıge kóterilgenin aıqyn ańǵartty. Búginde ǵylym el damýynyń negizgi qozǵaýshy kúshine aınalyp, ekonomıkalyq ósimge, tehnologııalyq táýelsizdikke, ekologııalyq qaýipsizdikke jáne ulttyq qaýipsizdikke tikeleı yqpal etip otyr.