Qostanaıdaǵy polıtehnıkalyq kolledj stýdentteri jergilikti polıseılerdiń «Zorlyq-zombylyqsyz 16 kún» aksııasyna qoldaý bildirdi.
Jastar aksııaǵa «Qýyrshaq chellendj » degen erekshe fleshmob daıyndady. Olar ózderi maneken sekildi turyp, kópshiliktiń kóz aldyna turmystaǵy zorlyq kórgen áıeldiń keıpin elestetti. Stýdentterdiń oılaǵan isin júzege asyrýǵa «Salaýatty ómir salty» ortalyǵynyń psıhologtary, Oblystyq ishki ister departamentiniń áıelderdi zorlyq-zombylyqtan qorǵaý tobynyń jáne L.Tolstoı atyndaǵy oblystyq ámbebap kitaphananyń qyzmetkerleri kómekke keldi. Fleshmob oblystyq kitaphanada uıymdastyryldy, stýdentter kelýshilerge, kóshedegi júrginshilerge «Qorǵaýǵa qadam jasa» atty býkletter taratty.
«Zorlyq-zombylyqsyz 16 kún» aksııasy elimizdiń barlyq jerinde ótedi. Otbasylarynda bolyp jatatyn keleńsiz kórinisterge tózimsiz qaraý úshin kún saıyn túrli sharalar ótkizemiz. Kolledj stýdentteri bizdiń bastamany qoldap, ózderiniń fleshmobyn ótkizdi. Olar uıymdastyrǵan «Qýyrshaq chellendj» boıynsha betterin grım arqyly kókala torǵaıdaı taıaq jegen sekildi etip boıaǵan jastar kóshede kele jatyp, birden jábir kórgen áıeldiń túrine enip, qýyrshaqtaı tas bolyp turyp qalady. Munyń barlyǵy túsirilip, ǵalamtor arqyly taratylady» deıdi Oblystyq ishki ister departamentiniń qyzmetkeri, polısııa kapıtany Gaýhar Haırýllına. Kameraǵa túsirilgen fleshmob «Zorlyq-zombylyqsyz 16 kún» degen atpen ǵalamtorda taratylady. Bul aksııaǵa, eń bastysy qoǵamdaǵy keleńsiz kóriniske jurt nazaryn kóbirek aýdaratyn bolady.
Názıra Járimbet,
«Egemen Qazaqstan»
Qostanaı