Belgili ánshi, «Astana-Opera» teatrynyń jetekshi solısi Súndet Baıǵojın Qostanaı qalasynda óziniń jeke konsertin berdi.
«Týǵan jer» baǵdarlamasy aıasynda ótken bul konsertin ánshi «Týǵan jerge taǵzym» dep atapty. Onyń sebebi de bar. Súndet 2018 jyldyń qańtarynda Eýropaǵa attanady.
Italııadaǵy Rım opera teatrymen jasasqan kelisim-shart boıynsha álemniń tanymal ánshileri óner kórsetetin sahnada eki jyl qyzmet isteıdi. Osy saparynyń aldynda ol týǵan jerge kelip, jerlesterine ónerin tartý etýdi jón sanapty.
«Men Arqalyq qalasynda óstim, bilim aldym. О́nerge umtyldym. Biraq qazir opera sekildi úlken ónerde belgili tabystarǵa jetip, elordadaǵy keremet «Astana-Opera» teatrynyń jetekshi ánshisi dárejesine jetkenmen, týǵan jerimde ánimdi tyńdatýǵa yńǵaıy kelmeı júretin edi. Endi uzaq saparǵa attanar aldyndaǵy az ýaqytty paıdalanyp, jerlesterime tuńǵysh jeke konsertimdi usynǵym keldi. Muny álemdegi bedeldi teatrdaǵy qyzmetim, ónerdegi eńbegim abyroıly bolýǵa jerlesterimnen, tilegimdi tilep otyratyn aýyldaǵy aǵaıyn-jurtymnan alǵan batam dep te túsinemin» dedi Súndet Baıǵojın.
E.О́mirzaqov atyndaǵy oblystyq fılarmonııanyń konsert zalynda Súndet Baıǵojın tyńdarman qaýymdy káýsar bulaqtaı án tunyǵyna sýsyndatty. Ánshi jerlesterine Abaıdyń, qazaq kompozıtorlarynyń jáne halyq ánderinen bastap, «Abaı» operasyndaǵy Abaı arııasy men álem opera ónerindegi injý-marjandardy tartý etti. Ánshiniń keń tynysty talanty jerlesterin tánti etti. Ánshi konsertiniń aldynda oblystaǵy buqaralyq aqparat quraldary úshin baspasóz máslıhatyn ótkizip, óziniń josparlarymen bólisti.
Názıra Járimbet,
«Egemen Qazaqstan»
Qostanaı