Pavlodarda Zahar Bochınniń 3-dárejeli Dańq ordeni uly Vıktor Bochınge tabys etildi.
Jýyrda Dostyq úıinde erekshe jıyn ótti. Marapattaý rásimine Reseıdiń О́skemendegi Generaldy konsýldyǵynyń attashesi Danııl Lapach qatysty. Marapat kýáligin tapsyrǵan konsýl ókili Zahar Bochın de, onyń uly Vıktor Bochınniń de Otan soǵysynyń tarıhyn jas urpaq arasynda nasıhattap júrgenin aıtyp ótti.
Osydan 20 jyl buryn oblys ortalyǵyndaǵy Slavıan mádenı ortalyǵy «Vahta pamıatı» atty jobany bastady. Birlestik músheleri 1941-1945 jyldardaǵy qujattardy izdestirýge, tarıhty saqtaýǵa jáne urpaq arasynda nasıhattaýǵa ózderiniń úlesterin qosýda. Birlestik tóraıymy Tatıana Kýzınanyń aıtýynsha kóptegen maıdagerler ózderine arnalǵan marapattardyń bar ekenin bile almaı ketti. Soǵys ýaqyty, maıdannyń bir shebinen ekinshi shebine aýysý, gospıtalder, habarsyz ketkender, biraq nagradalardyń buıryqtary arhıvterde saqtaldy. Maıdanǵa qatysqandardyń urpaqtary úshin osy nagradalardyń kýálikteriniń kóshirmelerin jasaý múmkindigi týdy.
Endi mine, Otan soǵysynyń ardageri Z.Bochınniń ordeni ulyna tabys etildi.
– Lenıngradtaǵy aýylsharýashylyq ınstıtýtyn bitirgen meniń ákem Pavlodar oblysyna kóship keledi. Ákemiz 1943 jyly ol maıdanǵa attanǵan kezde úıde 3 bala qaldyq. Ákem soǵystan oralǵan soń, taǵy da 6 balasy dúnıege keledi. Kóp jyldar óńirinde zootehnık bolyp eńbek etti. 1979 jyly qaıtys boldy. Búgingi kún bizdiń áýlet úshin erekshe kún, - dedi Vıktor Zaharovıch. Nagradanyń bar ekendigi «Podvıg naroda» saıty arqyly anyqtalypty.
Farıda Byqaı
«Egemen Qazaqstan»
Sýretti túsirgen Maqsat aıtbaı
Pavlodar