Astanadaǵy 24 etnomádenı birlestik elordanyń 20 jyldyǵyn merekeleýge belsendi atsalysatyn bolady. Bul týraly Astana qalasy Qazaqstan halqy assambleıasynyń XVI sessııasynda belgili boldy, dep habarlaıdy elorda ákimdiginiń medıa ortalyǵy.
Astana qalasy ákimdiginde «Qoǵamdyq sanany jańǵyrtý – qazaqstandyq patrıotızmniń negizi» atty taqyryppen Astana qalasy Qazaqstan halqy assambleıasynyń XVI sessııasy ótti.
Is-sharaǵa QR Prezıdenti Ákimshiliginiń ókilderi, depýtattar, Qazaqstan halqy assambleıasynyń músheleri, memlekettik organdardyń jáne etnomádenı birlestikterdiń ókilderi qatysty.
Keler jyly elordanyń 20 jyldyǵyn atap ótýge baılanysty aýmaqtyq is-sharalar ótkizý josparlanǵan. Osyǵan baılanysty sessııa jumysy barysynda Qazaqstan halqy assambleıasy tóraǵasynyń orynbasary – QR Prezıdenti Ákimshiligi Qazaqstan halqy assambleıasy hatshylyǵynyń meńgerýshisi D.Myńbaı elordamyzdaǵy etnomádenı birlestikter ókilderin qala mereıtoıyn uıymshyldyqpen atap ótýge shaqyrdy.
Astana qalasy ákiminiń orynbasary Ermek Amanshaev Astana qalasy Qazaqstan halqy assambleıasynyń eń negizgi baǵyttarynyń biri – «Rýhan jańǵyrý» baǵdarlamasyn júzege asyrý ekenin aıtyp ótti.
«Baǵdarlamalyq maqalanyń maqsaty – bárimiz birge bolashaqtyń jasampazdyǵyn odan ári órkendetý úshin jumyla atsalysýymyz kerek. Onyń birinshi sharty – Qazaqstan halqy assambleıasy qyzmetiniń basty mindetine aınalǵan ulttyq kodymyzdy jáne ulttyq mádenıetimizdi saqtaý paryzymyz», dedi Ermek Amanshaev.
Elordalyq assambleıanyń XVI sessııasyn qorytyndylaý barysynda qarar qabyldanyp, ol boıynsha Astana qalasy Qazaqstan halqy assambleıasynyń elorda damýyna aıtarlyqtaı úles qosqan eńbegine oń baǵa berildi.
Aıta keteıik, Astanada 24 etnomádenı birlestik bar. Olar Qazaqstan halqy assambleıasy jumys istegen 22 jylda qoǵamdyq kelisim men tatýlyqty qamtamasyz etýde nátıjeli jumys istep keledi.